Timoroan hamutuk 59 remata ona sira-nia formasaun iha Solo, Indonézia

Sekretaria Estadu Polítika Formasaun Profisionál no Empregu (SEPFOPE), iha loron 26 fulan Setembru iha salaun Sentru formasaun Profisionál SENAI Bekora, simu hikas fali formandu hamutuk 59 kompostu hosi feto hamutuk 27 no mane 32 ne’ebé maka remata ona sira-nia formasaun durante fulan rua iha Solo, Indonézia.

Formandu sira ne’e tuir formasaun iha área oin-oin, hanesan Soldadura hamutuk ema nain 9, eletrisidade nain 6, kostura nain 4, automotivu nain 6, sekretária nain 4, kulinária nain 7, téknika arrefesimentu nian 1, ofisina motór nain 2, eletrónika nain 4, kontabilidade komputadór nain 5 no eskultura madeira (ukir kayu) nain 6.

Iha serimónia ne’e Vise Primeiru-Ministru, Fernando La Sama de Araújo, hateten, ba formandu sira, katak “edukasaun ne’ebé mak imi hetan atu eduka fali, eduka atu hadomi no fahe saida mak imi hetan, ne’e maka prinsÍpiu ne’ebé foinsa’e sira tenke kaer, ne’ebé ha’u hanoin formasaun durante fulan rua  hanesan tempu badak atu dehan imi bele, maibé imi iha ona fundasaun ka pasu ida  atu hakat bá oin”.

“Parabéns ba imi-nia formasaun, foinsa’e sira tenke haka’as an tuir treinu tanba imposivel atu ita hotu-hotu tenke sai Vise Primeiru-Ministru, imposivel mós ita hotu-hotu atu sai funsionáriu públiku, nune’e mós ema balun de’it maka  sai diretór nasionál, diretór-jerál. populasaun Timor-Leste pursentu 60 maka foinsae no pursentu 20 maka katuas-ferik sira, tan ne’e nasaun foun, ho nia populasaun barak maka foinsa’e sira, sai nu’udar dezafiu ba ita hotu, Imi labele hanoin de’it katak ne’e dezafiu de’it ba sira, ba povu de’it, lae, ba ita hotu-hotu, maibé ita hotu-hotu tenke hanoin atu partisipa oinsá maka fó solusaun ba situasaun ida ne’e", dehan Vise Primeiru-Ministru.

“Hanesan reprezentante Governu liuhosi SEPFOPE hakarak agradese ba formandór sira ne’ebé maka durante ne’e fó ona ajuda no akompaña ami-nia alin sira durante formasaun iha Solo. Ita boot sira nia akompanamentu hanesan ínisiu loke pájina foun ba ami, oinsá maka bele prepara buat ne’ebé importante ba nasaun.  No ba formandu sira, ha’u husu atu kontinua nafatin ho abilidade ne’ebé iha la’ós rai de’it maibé bele implementa saida mak imi hetan durante ne’e no ne’e sei sai hanesan orientasaun ka motivisaun ba maluk sira seluk ne’ebé sei mai”, hateten Sekretáriu Estadu Polítika Formasaun Profisionál no Empregu, Ilido Ximenes da Costa.

Reprezentante formadór NUR Setiawan, hein katak relasaun kooperasaun entre Timor-Leste no indonézia iha área treinamentu ba servisu nian bele kontinua nafatin ba oin no ba grupu sira seluk ne’ebé tuir mai.