Komisaun D Husu SEPFOPE Sosializa Lei Trabalhadores



Komisaun D Parlamentu Nasional ne’ebe trata asuntu Ekonomia no Dezemvolvimentu, husu ba Sekretáriu Estadu Polítika Formasaun Profesional no Empregu (SEPFOPE) atu sosializa lei trabalhadores iha Kompañia nain sira iha Timor-Leste, nune’e labele prejudika trabalhadores.

Tuir prezidente Komisaun D, Jacinta Abu Cau Pereira, katak, atu efisiente liu, SEPFOPE atu sosializa informasaun iha fatin hot-hotu tenki foka liu ba emprezariu sira ne’ebe servisu ba trabalhadores sira.

“SEPFOPE atu sosializa informasaun sobre lei ba trabalhadores sira iha fatin hot-hotu tanba iha semana kotuk liu ba ita nia trabalhador mai hato’o informasaun sobre hahalok husi nia patraun katak nia husu lisensa loron tolu tanba oan moras maibe hafoin nia tama fali husi patraun ninian haruka nia tenke sai husi serbisu,” informa Prezidente Komisaun D, Jacinta Abu Cau Pereira liu husi Plenaria, segunda (17/12) iha parlamentu Nasional.

Prezidente Komisaun D ne’e mos hatutan liu tan katak, nia sente Patraun ne’e seidauk hatene kona ba informasaun lei trabalhadores ne’ebe estabelese tiha ona iha nasaun soberanu ida ne’e. DÍARIO