KSTL Husu Altera Lei Salariu Minimu

DILI – Konfederasaun Sindikatu Trabalhadór Timor-Leste (KSTL) husu ba governu no Parlamentu Nasionál atu altera lei salariu minimu tanba kustu produtu sira iha merkadu aumenta.

Lei salariu minimu ne’ebé aplika durante ne’e mak US $115 kada fulan. KSTL husu atu hasa’e ba US $157,23 kada fulan.

Prezidente KSTL, Agostinho Soares, dehan governu no Parlamentu Nasionál (PN) presiza altera lei salariu minimu, tanba hafoin lei ne’e implementa kustu produtu iha merkadu mós aumenta.

Tuir nia kustu produtu daudauk ne’e sa’e aas, ida ne’e halo trabalhadór sira laiha kbiit atu sosa.

Ezijensia ne’e, Agostinho dehan, KSTL halo bazeia ba fiskalizasaun ne’ebé hala’o iha rejiaun Lorosa’e, rejiaun Oeste, no Rejiaun Sentral.

Fiskalizasaun ne’e finaliza ona no daudaun ne’e tama ona iha faze elaborasaun no iha tempu badak sei públika ninia rezultadu ba públiku.

“Konklujaun ba salariu minimu ne’ebe mak ami hakarak aprezenta salariu minimu iha setór privadu dollar $157,23, ne’e ba setór privadu,” dehan Agostinho iha Seminariu ho Tema “01 Maiu, Dignifika Serbisu Nasionál Hanesan Xave Importante ba Dezenvolvimentu Nasionál”, Tersa (30/04).

Ba setór públiku, nia dehan, dependente ba governu, maibé presiza mós reforma jestaun funsionamentu administrasaun públiku.

“Funsioariu (públiku) sira hahu serbisu iha 2002 too agora laiha promosaun,” dehan Prezidente KSTL ne’e.

Tuir nia altera salariu minimu ne’e hanesan parte ida atu oinsa bele motiva trabaladór no funsionariu públiku sira hodi bele servisu di’ak liu tan.

“Ha’u fó ezemplu, funsionariu Alfandega iha fronteira enkuantu ho salariu ne’ebé ki’ik, mais ema hakarak kombate importasaun ilegais, mais kuandu ema sogok ho osan ne’ebé boot nia prefere liu atu simu osan ne’e (duke) hein salariu kiik mensal,” dehan nia.

Iha fatin hanesan, Sekretariu Estadu Politika Formasaun Profesional no Empregu (SEPFOPE), Ilídio Ximenes da Costa dehan salariu minimu hanesan pasu foun ne’ebé mak Timor-Leste halo.

“Ita hatene katak, Timor-Leste foin mak hahú maibé iha ona lei trabalhadór ninian, entaun lei ida ne’e hatudu ba ita katak ita iha tan pasu ne’ebé mak importante,” dehan SE Ilídio.

Ilídio hatete, lei fó dalan atu halo revizaun ba salariu minimu, maibé kestaun mak tempu to’o ona atu halo revizaun ka lae.

“Ita hakarak aumenta salariu minimu ita tenki haree ba industria iha ka lae, investór barak mak mai investe ka lae. Husi industria mak ita bele regula salariu minimu,” dehan nia.