SEPFOPE Lansa Reklame “Salva Vida Trabaolhadór”

DILI – Sekretariu Estadu Politika Formasaun Profesional no Empregu (SEPFOPE) lansa reklame ne’ebé sai hanesan kampaña boot ida hodi defende no proteje trabalhadór sira durante hala’o sira nia servisu.

Reklame ne’e monta imajen Prezidente Repúblika, Taur Matan Ruak, ne’ebé uza hela ekipamentu servisu, no iha sorin hakerek “Uza Ekipamentus ba Seguransa no Saude iha Serbisu Fatin”.

Aleinde harii reklame, SEPFOPE mós halo lansamentu ba ekipamentu salva vida hanesan kapaseti no kamija serbisu ba trabalhadór sira.

Sekretariu Estadu Politika Formasaun Profesional no Empregu, Ilídio Ximenes da Costa hatete, reklame ne’e sei monta iha distritu 13 atu nune’e bele hafanu ema hotu katak salva vida ne’e importante.

“Ita husu mós ba empregadór sira, kontratór ou kompañia sira tenke fó mós tramentu ne’ebé di’ak ba trabalhadór sira,” dehan SE Ilidio iha Mandadrin, Tersa (30/04).

Kona-ba imajen PR Taur iha reklame ne’e, Ilídio dehan, ho razaun tanba Prezidente Repúblika sai hanesan aman ba dezenvolvimentu.

Iha fatin hanesan, Ministru Justisa, Dionisio Babo dehan komemorasaun ba loron Internasional ba Trabaladór iha Timor-Leste hatudu katak estadu TL fó mós nia antensaun maka’as ba asuntu trabaladór.

Tanba, nia dehan, trabalhadór sira fó kontribuisaun maka’as ba prosesu dezenvolvimentu nasaun.

“Tanba ne’e ha’u hakarak fó primeiru parabéns ba SEPFOPE, tanba konsege implementa saida mak hakrek ona iha lei. Segundu parabóns ba Parlamentu Nasionál (ba) apoiu tomak ne’ebé mak fó durante ne’e. Fó parabéns mós ba empegadór sira,” dehan Babo.