Asuransia ne’ebe Governu Korea do Soul sei fo ba trabailador ho montante orsamentu hamutuk USD$75 mil. USD$30 mil sei fo ba trabailador ne’ebe hetan asidenti kaman hanesan liman fuan kotu no USD$45 mil sei fo ba trabailador ne’ebe hetan asidenti mate fatin.
Antes ne’e Governu Korea do Soul fo ona asuransia USD$45 mil ba trabailador nain 3 iha area peskas ne’ebe mate iha tinan 2011 to’o 2012, no USD$30 mil ba trabailador nain 1 ne’ebe iha tinan kotuk hetan asidenti liman fuan kotu iha fabrika.
Adidiu TL iha Korea do Soul, Marito Silva Freitas Sarmento hateten, asidenti ne’ebe Governu Korea do Soul liu husi kompana sira fo ba trabailador sira iha kategoria rua, primeiru asidenti kanek no segundu maka asidenti grave ou mate.
Marito hatutan, asuransia ne’ebe fo ne’e bazeia ba MoU ne’ebe governu TL ho Korea liu husi ministeriu trabailao asina iha tinan kotuk liu ba.
“Hau hakarak informa durante ita hahu asina akordu Memorandum of Outstanding (MoU) entre TL ho Korea liu husi Ministeriu Trabailo TL ho Korea ne’ebe mensiona kedas katak prosesu ida ne’e prosesu governu ba governu,”Marito dehan lia ne’e ba diariu ne’e iha ilha Jeju-Korea, Sabdo (15/09).
Ezemplu, Marito dehan, trabailador sira ne’e tama ho legal tuir prosesu ne’ebe maka governu TL halao ne’ebe bolu programa employment permit system (EPS), no programa ida ne’e governu TL hahu iha tinan 2009 maibe asina akordu iha tinan 2008 fulan Maio.
Asuransia ho montante hira maka Governu Korea do Soul sei fo ba trabailador, Marito esplika, ezemplu iha esperensia tinan kotuk liu ba trabailador ne’ebe hetan asidenti liman kotu hetan USD$30 mil, no balu ne’ebe mate hetan USD$45 mil.
Trabailador hetan asidenti iha hira no hira maka simu ona asuransia husi governu Korea, Marito haktuir, foin dau-dauk iha trabailador 3 maka mate, nain 3 mate ne’e iha nain 2 maka hetan ona asuransia, no nain 1sei iha prosesu nia laran tanba presij dokumentus husi parte Ministeriu Saude no trabailador nain 1 ne’ebe hetan asidenti liman fuan kotu hetan ona mos asuransi.
Trabailador nain tolu ne’e mate tanba saida no servisu iha area ne’ebe, Marito haktuir, trabailador nain 3 mate ne’e, ida moras fuan, ida sae bisikleta maka monu, no ida mesin dada ho redi kail ikan no nain ida ne’ebe maka liman fuan kotu servisu iha area fabrika.
“Iha ne’e hau hakarak sublina foin dau-dauk liu ba trabailador hetan asidenti kaman ou mate, ami trata kedas sira ninia dokumentu hodi haruka ba iha sira nia familia nia numeru konta no familia sira hetan duni asuransia ne’e,”Marito dehan tan.
Diferensia ka lae asuransia ba trabailador sira ne’ebe servisu legal no illegal, Marito esplika, trabailador ne’e kuandu legal, signifika sei hetan konsiderasaun tuir akordu ou lei trabailo ne’ebe iha Korea, maibe sira ne’ebe illegal, ne susar tebes.
Tanba ne’e marito espera katak, hahu ba oin ne’e sei laiha tan asidenti ne’ebe maka akontese ba trabailador sira.
“Hau espera katak ba oin ne’e laiha tan asidenti no hau reja para labele iha tan,”Marito hakotu.
Esperanca ba sira hodi aumena performance servisu iha Korea.
ReplyDelete