Hasa’e Estandarte Treinamentu Internasionál

Sekretariu Estadu ba Politika Formasaun Profesional no Empregu (SEPFOPE) Ilidio Ximenes da Costa akompanha husi Chefe Departementu Empregu Temporariu Lucio Bere Tasi, Enjineiru nain rua Felisberto da Cruz no Martino Govea Leitte iha enkontru hamutuk ho IKRAM TRAINING GROUP Malaysia ne’ebe akompanha no hetan aprezentasaun husi Diretor Taufik Abd Rahim koalia kona ba formasaun ba trenamentu iha area eletrisidade, mekanika, instalasaun AC no service motorizada iha Salaun Enkontru IKRAM, Selangor, Malaysia, Kinta (03/04).

Sekretariu Estadu ba Politika Formasaun Profesional no Empregu (SEPFOPE) Ilidio Ximenes da Costa visita iha fatin trenamentu IKRAM TRAINING GROUP Malaysia iha serimonia enkontru hamutuk entre SEPFOPE ho IKRAM, koalia kona ba formasaun ba trenamentu iha area eletrisidade, mekanika, instalasaun AC no service motorizada iha Salaun Enkontru IKRAM, Selangor, Malaysia, Kinta (03/04).

Sekretariu Estadu Polítika Formasaun Profesionál no Empregu (SEPFOPE) Ilídio Ximenes da Costa, Kinta (03/04), hala’o vizita ba Sentru Treinamentu IKRAM Group Malayzia hodi koalia kona-ba oinsa atu dezenvolve treinamentu no tekniku prevene rai-halai.

Iha sorumutu ho parte IKRAM Group, reprezentante IKRAM Diretór Taufik Abd Rahim, aprezenta kona-ba treinamentu balun no meius prevene rai-halai ne’ebé durante ne’e sentru treinamentu ne’e uza.

Sekretariu Estadu ne’ebé akompaña husi Xefe Departamentu Empregu Temporariu, Lucio Bere Tasi, dehan iha sorumutu ne’e IKRAM Group fó sujestaun barak kona-ba treinamentu no oinsa atu prevene rai-halai.
Iha vizita ne’e, Sekretariu Estadu ho komitiva vizita mós Laboratoriu no Fasilidade iha kada departamentu iha sentru ne’e hodi haree direitamente prosesu pratika ne’ebé lao.

Ida ne’e bele sai hanesan baze ka sasukat ba sentru treinamentu sira iha Timor-Leste.

Programa treinamentu iha IKRAM mak hanesan: Eletrisidade, Mekanika, Instalasaun AC no Service Motor.
Sentru treinamentu ne’e harii iha tinan 2002 no konsege produs treinadu na’in 8.000. Entre treinadu hirak ne’e, na’in 740 mak servisu tuir ninia espesialidade, no restu servisu iha fatin servisu seluk.

Estandarte treinamentu pratika mekanika iha IKRAM hetan sertifikadu husi Japaun ba kualidade.
Entretantu, hafoin vizita sentru treinamentu ne’e, Sekretariu Estadu hala’o vizita ba Fabrika TENCATE Sham Alam Malaysia. Fabrika ne’e hanesan fabrika ida ne’ebé produs ekipamentu atu prevene rai-halai.
Iha enkontru, estaf husi diresaun prevensaun rai-halai TENCATE esplika ba Sekretariu Estadu ho komitiva kona-ba meius atu prevene rai-halai.

Hafoin enkontru, Sekretariu Estadu ho delegasaun akompañia husi estaf TENCATE haree prosesu produsaun material ba prevene rai-halai. Estaf TENCATE esplika hahú husi prosesu produsaun too prosesu haruka.

Hafoin vizita fabrika ne’e, Sekretariu Estadu fó pintura ne’ebé Timor-oan sira produs hanesan rekordasaun ba Fabrika TENCATE Sham Alam ne’ebé reprezenta husi ninia Jeneral Manajer.

Hafoin vizita fabrika ne’e, Sekretariu Estadu hala’o hikas vizita ba Slop Remedial work EiMAS UKM Bangi/Slopelnstrumentation Putrajaya atu haree direitamente kondisaun rai-halai no prosesu prevensaun.

Slop Remedial work EiMAS UKM Bangi/Slopelnstrumentation Putrajaya hanesan kompañia ida ne’ebé iha esperensia kona-ba prevensaun rai-halai iha área hirak ne’ebé iha risku boot ba rai halai iha Malayzia.
Iha vizita ne’e, Sekretariu Estadu hetan esplikasaun husi estaf tekniku sira kona-ba prevensaun rai-halai, nune’e bele halo mós iha Timor-Leste.