Halakon Traballu INFANTIL

Sekretariu Estadu ba Formasaun Profesional no Empregu (SEPFOPE) liu husi Diresaun Inspesaun Jeral Traballu (IGT), hala’o kampanha  komemorasaun loron mundial traballu infantil nian ne’ebe partisipa husi funsionariu IJT tomak ne’ebe aproveita  fahe stiker no informasaun kona ba direitu labarik sira nian iha kada Eskola Ensinu Báziku - Dili, (12/06).

Aktividade  ne’ebe mak IGT hala’o iha kada eskola ensinu báziku, mak hanesan iha Eskola Ensinu Báziku Central Bidau Akadirhun Farol, Primaria No 2 Bebonuk, Central Manleuana no Santa Terezinha do Menino Jesus Sabraka Laran Becora.

Mekanismu ne’ebe utiliza husi funsionariu sira hodi fornese informasaun ba eskola hirak ne’e  mak tama ba aula eskola nian hodi hato’o informasaun diretamente ba labarik sira.

 “Imi iha direitu ba estuda  no halimar,  tamba imi mak futuru nasaun nian” tenik Inspetor Jeral Traballu Interino,  Mateus Nominando hodi sublinha ba existensia Lei  Traballu Infantil  ne’ebe hateten katak labarik  minoridade labele hala’o servisu todan tuir lei artigu 68.

Wainhira qualker labarik minoridade ne’ebe hala’o servisu todan signifika viola ona direitu fundamental labarik nia ne’ebe seidauk merese atu tula responsabilidade todan hanesan ema adultu.

Lei prohibidu atu labarik ho idade ki’ik hahú hala’o servisu todan tamba bele fo impaktu negativu ba labarik nia futuru em termu de viola sira nia direitu báziku atu halimar, eskola tuir periodu idade nudar labarik. Obrigasaun atu hala’o servisu todan bele perjudika labarik sira nia saude no mentalidade ne’ebe sei fo impaktu negativu maka’as ba sira nia futuru.