Traballadór 21 Halo Deklarasaun

Liu husi Diresaun Nasional Emprego SEPFOPE, husu ba trabalhadores asina

declaração antes ba Korea do Sul ho objectivo trabalhadores sira bele

haruka osan mai sira nian familia no sei la sai trabalhdores ida nebe ilegal iha

Korea do Sul, Sesta Feira (15/03).

□ La Kumpri Sei Deporta

DILÍ – Traballadór na’in 21 ne’ebé akompaña husi família, Sesta (15/3) asina kontratu hodi halo deklarasaun iha edifísiu Sekretáriu Estadu Polítika Formasaun Profissionál Empregu (SEPFOPE) antes ba servisu iha Korea do Súl Segunda semana oin.

                Deklarasaun ne’e atu fó hanoin ba traballadór atu hatene ona kondisaun servisu, sei halo knar hanesan traballadór, sei rembolsu kreditu, kreditu ne’ebé foti tenki iha koinesementu, sei haruka salariu 50% ba família, no tenki halo tuir kontratu ne’e.

                Traballadór ne’ebé asina kontratu hodi halo mós deklarasaun antes Segunda semana ne’e atu ba servisu iha Korea do Súl tenki kumpri, se la kumpri kontratu no deklarasaun ne’e, SEPFOPE sei deporta fali fila mai Timor Leste.

                Kontratu no deklarasaun ne’ebé SEPFOPE halo bazeia ba despasu husi Primeiru Ministru, tanba iha tinan kotuk traballadór barak maka la haruka osan mai família sira liu-liu fen kaben.

                “Traballadór sira ne’ebé servisu ona iha Korea do Súl balu la haruka osan mai família sira liu-liu sira nia fen kaben ou laen kaben,” dehan, Sekretáriu Estadu Polítika Formasaun Profissionál Empregu (SEPFOPE), Ilídio Ximeneas da Costa ba Jornalista sira iha Caicoli Díli, Sesta (15/3).

                Tanba ne’e maka iha loron 21 fulan Janeiru tinan 2013, Primeiruy Ministru rasik bolu (Ilídio –red) iha tuku 9 kalan Otl ba kedas Primeiru Ministru nia hela fatin atu fó hanoin nia dehan katak tenki hadi’a sistema ne’e.

                Nia dehan, ho ida ne’e maka SEPFOPE foti desizaun ida katak antes traballadór atu ba servisu iha Korea do Súl tenki halo deklaeasaun ida par abele haruka osan mai inan aman no fen kaben ou laen kaben.

                “Agora meius ba deklarasaun ne’e Primeiru sasin na’in rua, testamunha inan-aman, fen-ho laen tenki fó testamunha ba deklarasaun ne’ebé traballadór atu asina para bele kumpri,” Ilídio realsa.

                Sekretáriu Estadu ne’e hatutan, deklarasaun ida ne’e traballadór tenki halo atu hametin buat tolu entre Governu, Famíli no saksi ida tan. Portantu traballadór la kumpri deklarasaun ida ne’e iha, adidu ne’ebé iha Korea do Súl iha direitu atu fó hatene katak traballadór ida ne’e la tuir deklarasaun ne’ebé asina tiha ona, entaun desizaun ikus antes Korea deporta ita mak tenki deporta uluk.

                Kona-ba traballadór ne’ebé servisu ona iha Korea do Súl, nia konfesa sei kontinua hodi kopia deklarasaun ba iha traballadór 114 ne’ebé iha Korea tenki asina deklarasaun ne’e.

                Entertantu, traballadór ne’ebé servisu ona iha Korea do Súl, nia parte sei kumpri duni deklarasaun ne’ebé nia asina ona atu nune’e osan ne’ebé nia hetan sei haruka duni mai inan-aman ho pursentu 50.

                Aleinde ne’e Costançio da Costa hateten tan, nia parte kontenti tebes ho deklarasaun ne’ebé SEPFOPE halo atu nune’e traballadór ida-idak tenki kumpri hodi haruka osan mai inan-aman sira.

                Iha seremonia asina kontratu ne’e, marka prezensa husi Sekretáriu Estadu Ilídio Ximenes, Diretór Nasionál Empregu Paulo Alves, Adidu na’in 2, traballadór no mós inan-aman no maun sira. TIMOR POST/EDISAUN 08342649