SEPFOPE - Governador Jeju Deskuti Kooperasaun Iha Area Formasaun

 

Sekretariu Estadu Politika Formasaun Profesional no Empregu (SEPFOPE), Ilidio Ximenes akompanha husi Adido Trabalho encontru hamutuk  ho Governador Jeju Island, Woo Keun-min  iha visita offical iha Jeju.

JEJU-Sekretariu Estado Politika Formasaun Profesional Empregu (SEPFOPE), Ilidio Ximenes da Costa ho ninia delegasaun halo vizita ofisial ba Governador Espesial Provinsia Jeju Island (Korea do Soul), Woo Keun-Min hodi deskuti kooperasaun iha area formasaun.

Vizita Delegasaun Sekretariu Estado, Ilidio Ximenes da Costa, kompostu husi Direitor Nasional Empregu (DNE), Paul Alves, Prezidenti Komisaun D Parlamentu Nasional ne’ebe trata asuntu ekonomia e finansas, Jacinta Pereira, Xefi Gabinete Sekretariu Estado Industria no Koperativa, Asesora SEPFOPE, Junia Lie, Tekniku enjineria SEPFOPE, Padre David Alves da Conceicao no Madre Francelina Ximenes Freitas.

 Vizita ne’e rasik konvoka enkontru entre Sekretariu Estado ho Governador especial Provinsia Jeju Island durante minute 30 nia laran ne’ebe koalia liu kona-ba dezenvolvimentu, atu oinsa maka provinsia Jeju Island bele tulun Timor Leste iha area formasaun liu-liu iha area konstrusaun, agrikultura, industria no heavy equipment.

Sekretariu Estado, Ilidio Ximenes da Costa, hateten, enkontru ho governador especial Jeju Island ho objetivu atu foó agradesementu ba sira ho aimoruk ne’ebe maka sira haruka ba iha Timor Leste.

Agradese mos ba Governador provinsia Jeju Islan nian ne’ebe haruka ona Aimoruk ba Timor Leste no mos agradese ba sira tanba ita nia trabailador nain 34 ne’ebe servisu iha ne’e sira tau matan ho diak tebes,”Ilidio dehan ba jornalista sira iha, edifisiu Governador Provinsia Jeju Island, Segunda (16/9).

Iha enkontru ne’e mos, Ilidio dehan, iha posibilidade bo’ot ba Governu Timor Leste atu koopera tan ho Governador provinsa Jeju Island ninian ba tinan lima mai. Iha area formasaun ba agrikultura, peskas, no mos heavy equipment.

ita hatene katak potensialidade ne’ebe bo’ot ba nasaun Timor Leste maka iha seitor turizmu, kultura, peskas no konstrusaun, maibe sei falta rekursus humanus,”Ildio dehan tan. tanba ne’e, Ilidio sublina, iha enkontru ne’e governador provinsia  Jeju Island ninian dehan sira dalan nakloke atu apoiu.

Ohin entrega mos dokumentus ba Governador Provinsia Jeju Island ninian, Dokumentus ne’e laos dokumentus ofisial maibe dokumentus kona-ba problema ne’ebe maka ita infrenta oinsa maka atu buka alternativa diak ida atu resolve liu-liu iha area formasaun sira ne’ebe temi ona,”Ilidio afirma.

Entaun, Ilidio dehan,  Governador Provinsia Jeju Island mos sei haruka ninia ekipa ba iha Timor Leste halo estudu hodi halao koperasaun hamutuk ho SEPFOPE atu fo kona-ba formasaun ninian iha area peskas, turizmu, agrikultura no mos kona-ba heavy equipment ninian.

Foto Hamutuk

Tuir, Ilidio katak, iha mos posibilidade ba sira atu halo investimentu iha TL tanba sira iha ona esperensia ne’ebe mais dezenvolvidu no ida ne’e depende ba sira laos iha area espesifiku maibe iha area formasaun maka SEPFOPE presija teb-tebes. kona-ba area sira seluk, Ilidio esplika, governu so oferese deit katak dalan nakloke ba sira bele halo investimentu iha ne’eba tuir lei ne’ebe maka TL iha i depois sira halo aprosimasaun ba ministeriu i tambem sekretariu estado ne’ebe relevante tuir rejultado ne’ebe sira peskija.

 Dokumentus ne’ebe entrega, oinsa responde husi governador provinsia Jeju Island ninian, Ilidio dehan, sira atende ho kontenti teb-tebes tanba ohin ita koalia, sira dehan buat hitu ne’e importante ba sira tanba problema ne’ebe maka ita identifika buka ninia solusaun.

Iha oportunidade ne’e, Governador Espesial Provinsia Jeju Island, Woo Keun-Min, hateten, dalan nakloke atu apoiu formasaun ba area ne’ebe maka Timor Leste presija hodi nune’e bele hasae liu tan rekursus humanus ne’ebe maka TL sei menus. enkontru ne’e rasik, Sekretariu Estado, Ilidio Ximenes da Costa entrega mos simblu tradisional TL hanesan uma lulik no tais ne’ebe iha dezenu ba Governador Espesial Provinsia Jeju Island, Woo Keun-Min, no Governador ne’e rasik mos entre libru istoria Jeju Island nian ba Sekretariu Estado.

Antes hasoru malu ho Governador Provinsia Jeju Island, Sekretariu Estado, ho ninia delegasaun halao uluk vizita hodi halao mos ekontru durante minute 45 nia laran ho supervizor Human Resourse Development (HRD), ne’ebe maka durante ne’e tau matan ba trabailador Timor oan sira ne’ebe servisu iha provinsia Jeju Island.

 Depois ne’e, Sekretariu Estado ho ninia delegasaun halao mos vizita ba Employment Suport Centre, Jeju Campus Polytechnic, no mos vizita ba Road Misterius ne’ebe hari  iha fulan Maio tinan 1775, nune’e remata vizita ne’e, Sekretariu Estado ho ninia delegasaun jantar hamutuk ho trabailador sira inklui empreza Koreano ninia.