INDMO Nia Funsaun ba iha Progressu Dezenvolvimentu Ekonomia Nasional

Hakerek husi:

Sonio Anuno da Silva

Asesor Nacional Petroleum no Marítima

INDMO-SEPFOPE.

 I. Legitimidade aktividade funsaun Administrasaun INDMO (Instituto Nacional de Desenvolvimento de Mão-de-Obra) ninian.

    Nudar instituisaun autonomo publiku nebe ha’mahan an iha Sekretaria de Estado para a Politica da Formação Profissional e Emprego (SEPFOPE) nia titular, INDMO, hanesan mos kna’ar misaun instituisaun publika sira seluk, hetan legitimidade ba direto prerogativu atu implementa nia kna’ar funsaun administrativo haktuir dekreto lei numero: decreto lei 8 /2008.
Kbi’it gestaun ba aktividade administrativu INDMO ninian lidera husi Diretor nasional nebe designado haktuir estatuto funsaun INDMO liu husi nomeasaun nebe approvado husi Sekretario Estado SEPFOPE. Estatuto Lei organiku administrativu INDMO ninian mak espesifika funsaun espesializadu departamentu ida idak nian haktuir nesesidade nebe persija hodi garantia qualidade ba implementasaun sistema kualifikasaun iha area treinamentu vokasional nune’e bele komplementa no ha’metin progressu aktividade dezenvolvimento sosio ekonomia politika nasional haktuir duni identidade uniku Timor Leste ninian; departamentu nebe hari’I ona iha kna’ar funsaun INDMO nia mahan mak hanesan: departamentu TVET (Technical Vocational Education and Training), Departamentu Kualifikasaun, Departamentu Akreditasaun, Departamentu Administrasaun Finansa no mos defini kna’ar funsaun komisaun ekzekutiva no sub komisaun industria ninian nebe instrumental tebes ba iha prosesu estabelesimentu programa kualifikasaun haktuir nivel sertifikado nebe defini iha sistema enquadramentu kualifikasaun nasional nebe konesidu liu ho naran TL-NQF (Timor Leste National Qualification Framework) system hodi komplementa ezizensia merkado trabalho nian ba abilidade trabalhadores sira.

II. Programa TVET

    Sistema TVET hari’I hodi defini qualidade ba sistema treinamentu nebe komplementa nesesidade merkado trabalho nia requerimentu ba abilidade trabalhodores sira, nune’e bele fo tulun atu hasa’e produtividade ba aktividade no susteinabilidade existensia industria nian loron-loron hodi bele kompete iha merkado lokal, regional no global. INDMO iha departamentu nebe dedikadu ba sistema TVET nian, no Departamentu TVET ne’e lidera husi kargu nebe dedikadu nudar chefi departamentu.

Objetivu prinsipal husi sistema TVET nian mak:

• Garantia kualidade ba abilidade (Skill and Knowledge) trabalhadores sira nian haktuir merkado trabalho nia nesesdiade no requerimentu.
• Atu Ha’metin industria lokal nia merkado kompetitivu
• Fasilta investimentu domestika no estrangeiro ba prosesu aktividade dezenvolvimentu ekonomia.
• Stimula kapasidade peskiza (research) instituisaun lokal nian hodi hare kona ba oinsa atu hasa’e qualidade produto lokal (rekurso humano no mos rekurso natural)
• Stimula estabelesimentu industria lokal hodi fornese material treinamentu lokal ba iha sentru treinamentu sira no industria sira rasik hodi ha’metin ekonomia no estabilidade sosio politika nasional.

 III. Sistema Kualifikasaun

   Kna’ar nebe INDMO simu haktuir legitimidade sistema TL-NQF nian mak dezenvolve pakote kualifikasaun ba nivel sertifikadu fundasaun, sertifikadu I to’o sertifikadu IV hodi ha’metin no komplementa aktividade ekonomia nasional. Pakote Kualifikasaun nebe hari’I, formuliza tuir identidade ekonomia Timor Leste ninian no konsidera mos importansia Timor Leste nia ekonomia assosiasaun no integrasaun ba iha ekonomia regional no ekonomia global hodi mantein harmonizasaun no qualidade sistema kualifikasaun nebe estabelese. Funsaun ne’e hala’o liu husi departamentu nebe dedikadu nudar Departamentu Kualifikasaun. Faze asaun ba Lala’ok atu estabelese pakote kualifikasaun hodi fo legitimasaun qualidade ba nivel sertifikadu nebe refere mak haktuir mai ne’e:

• INDMO hahu estabelese komisaun ida liu husi serbisu kontratu nomea ba firma privadu ka individu konsultansia externa hodi Defini no observa aktividade industria nebe nesesidade tebes ba iha merkado ekonomia Timor Leste nian haktuir kondisaun ril nebe oras ne’e dadaun existi.

• Estabelese Sub-Komisaun industria nebe sinonima ho konseitu konselho Treinamentu industria nebe reprezenta husi entidade relevante ho industria refere (instituisaun Governo, Sentru treinamentu, Uniaun trabalhadores no reprezentante industria sira rasik) nune’e bele kontribui hanoin no sira nia preokupasaun ba oinsa atu formuliza pakote kualifikasaun nebe bele hasa’e produtividade no fo insentiva ba orientasaun kompetitivu industria refere ninian iha merkado domestiku, regional no global.

• Hafoin konsulta tiha sub-komisaun industria no entidades relevantes sira seluk inklui mos istudo komparativu mak foin bele hahu dezenvolve unidades kompetensia nebe akumulativu iha nivel sertifikadu nebe nomeado hanesan sertifikadu fundasaun, sertifikadu I to’o sertifikadu IV depende mos ba progresso nivel maturidade industria refere iha aktividade ekonomia Timor Leste nia laran. Pakote Kualifikasaun ne’e mos mak sei determina oras aprendizagem ba sertifikadu nomeadu, kualifikasaun mestre/a sira nian, no mos material aprendizagem nebe persija atu fo garantia qualidade ba sertifikadu refere.

• Draft pakote kualifikasaun nebe estabelese antes promulga, persija approvasaun husi komisaun ekzekutiva.

• Wainhira komisaun ekzekutiva approva ona, sentru akreditadu ba kualifikasaun refere bele hahu ona implementa.

• Duranti periodu implementasaun, INDMO kontinua monitoriza no evalua qualidade pakote kualifikasaun ne’e nian nune’e bele alinhado ho merkado trabalho nia nesesidade requerimentu.

IV. Sistema akreditasaun

INDMO liu husi departamentu akreditasaun mak sei determina no fo legitimasaun legalidade ba sentru treinamentu nebe mak konsidera iha kapasidade atu implementa treinamentu vokasional ba iha pakote kualifikasaun nebe estabelese. Departamentu nebe dedikadu ba kna’ar serbisu ida ne’e nian mak hanesan mensiona ona, Departamentu Akreditasaun nebe lidera husi funsaun dediakdu nomeasaun chefi departamentu. Prosesu generalidade requerimentu minimum atu fo akreditasaun ba sentru treinamentu ida ninian mak haktuir mai ne’e:

• Fasilidade adequado edifisio husi sentru ninian hodi fasilita prosesu administrasaun

• Sentru nia minimum cash flow

• Kualifikasaun no merito experiensia mestre/a sira

• Fasilidade salaun treinamentu

• Fasilidade Laboratorio

• Asosiasaun no ligasaun Sentru nian ho industria sira.

Maturidade merkado trabalho hodi ha’metin kresimentu ekonomia nasional depende ba iha komitmentu no oinsa ita hari’I sistema treinamentu vokasional nebe bele explora no expose talentu Joven Timor oan sira nian hodi kapitaliza sira nia partisipasaun maximu iha duranti prosesu ekonomia dezenvolvimentu nasional. Investimentu ba iha Edukasaun no treinamentu mak sei determina diresaun lalaok ekonomia nasional.