Konsellu Ministru hala’o Sorumutuk iha Oe-Cusse Ambeno

Ministru Estadu no Prezidénsia Konsellu Ministru no

  Porta-Vóz Ofisiál Governu Timor-Leste

Konsellu Ministru hala’o Sorumutuk iha Oe-Cusse Ambeno

Konsellu Ministru Governu Timor-Leste nian sei hala’o sorumutuk iha Pante Macassar kapitál distritu Oe-Cusse Ambeno nian, iha sesta, loron 23 fulan-janeiru semana oin, hodi diskute kona-ba medidas importante sira ne’ebé mak atu foti hodi fó prioridade ba dezenvolvimentu distritu nian, inklui transferénsia podér sira. Partisipante sira mós sei hola parte iha eventu espesiál sira inklui Serimónia Transferénsia ida ba podér no fó hikas fali Kompetensia Governu Sentrál nian ba Autoridade Rejiaun Administrativa Oe-Cusse Ambeno nian.

Konstituisaun Repúblika Demokrátika Timor-Leste nian rekoñese estatutu espesiál ba Oe-Cusse Ambeno, enklave ida iha noroeste illa Timor nian, hodi hateten katak “hetan tratamentu administrativu no ekonómiku ida ne’ebé espesiál” no ne’ebé “sei ukun tuir polítika administrativa ida no rejime ekonómiku espesiál ida. Iha fulan Juñu tinan kotuk aprova ona lei n.^o  3/2014, hodi kria rejiaun administrativa espesiál Oe-Cusse Ambeno hodi estabelese zona espesiál ba ekonomia sosiál merkadu nian, ne’ebé hotu-hotu hatene nu’udar ZEESM. Oe-Cusse Ambeno hasoru dezafiu desenvolvimentu nian ne’ebé boot, ne’ebé sai grave tanba ninia dook tebetebes hosi teritóriu prinsipál Timor-Leste nian. Tuir Lei, objetivu Rejiaun Administrativa Espesiál ne’e nian maka hetan “dezenvolvimentu inkluzivu rejiaun nian, fó prioridade ba atividade sósioekonómika hodi promove kualidade moris no moris-di’ak komunidade nian”.

Eis-Primeiru-Ministru, Dr. Marí Alkatiri, Prezidente Autoridade Rejiaun Administrativa Espesiál Oe-Cusse Ambeno nian no Prezidente Zona Espesiál sira Ekonomia Sosiál Merkadu Oe-Cusse Ambeno nian no Ataúro, hatete katak, Autoridade ne’e sei uza “abordajen integrada ida kona-ba dezenvolvimentu sosiál no ekonómiku sustentavel”, ne’ebé hetan liuhusi “investimentu iha formasaun, edukasaun no saúde povu Oe-Cusse Ambeno nian, iha tempu hanesan mós sei investe iha infraestrutura importante sira, hanesan estrada, ponte, eskola, no sira seluk hodi ajuda harii ekonomia rejionál ida ne’ebé dinámika.

Iha orsamentu ba tinan 2015 nian  fó dolar amerikanu millaun $81,9 ba Autoridade hodi investe, nune’e aselera dezenvolvimentu ekonómiku inkluzivu no dezenvolve infraestrutura bázika sira. Rejiaun ne’e sei uza ninia estatutu Zona Ekonómika Espesiál hodi atrai investimentu rai-liur ne’ebé iha kualidade no inisiativa negósiu nian ba tempu naruk. 

Dili, loron 16 fulan-janeiru tinan 2015