Governu Planeia Uza Tijolu Kesi Harii Uma MDG’s




Sekretariu Estadu ba Formasaun Profesional no Empregu (SEPFOPE) servisu hamutuk ho Ajensia Dezenvolvimentu Nasional (ADN) sei hala’o levantamentu dadus oinsa atu bele uza tijolu kesi ba projetu harii uma lima kada aldeia tuir programa Milenium Development Goals (MDG’s).

Sekretariu Estadu (SE) Ilidio Ximenes da Costa koalia ona ho Primeiru Ministru (PM) Xanana Gusmao kona-ba oinsa atu uza tijolu kesi hodi harii uma MDG’s. PM Xanana aseita ho ideia ne’e.

SE Ilidio dehan PM Xanana fo ona autorizasaun ba Diretor ADN atu buka dalan oinsa bele uza tijolu kesi ne’e.

SEPFOPE servisu hamutuk ho enjineiru ADN sei halo levantamento dadus kona-ba rai-mean no rai-mutin iha distritu sira ne’ebe iha pontensial hodi bele halo produsaun ba tijolu kesi.

Bainhira dadus ne’e iha ona, SEPFOPE Ilidio dehan, nia parte prontu fo formasaun kona-ba produsaun tijolu kesi iha distritu hirak ne’ebe seidauk iha.

Daudaun ne’e SEPFOPE iha ona fatin formasaun produsaun tijolu kesi iha Distritu Ermera, Liquica no Manatuto.

Iha tinan 2014, Ilidio dehan, bainhira planu uza tijolu ba uma MDG’s fiksu ona no SEPFOPE iha tan orsamentu ba halo produsaun tijolu sei loke tan fatin treinamento iha Distrito seluk depende ba ADN atu halo uma lima iha ne’ebe.

“SEPFOPE sei serbisu hamutuk ho ADN iha area formasaun no mos liu husi programa auto emprego hodi bele fasilita kompania sira ne’ebe iha interese kona-ba halo produsaun tijolu kesi”, dehan Ilidio.

Vizita Fatin Produsaun

Entretantu, SE Ilidio iha Sesta (08/11) hamutuk ho Xefi Emprego Rural Lucio Bere Tasi ho ekipa halo vizita ba fatin produsaun tijolu kesi iha Distrito Liquica no Ermera.

SEPFOPE liu husi programa Auto Empregu servisu hamutuk ho CHL no ILO ajuda komunidade sira oinsa bele halo no produs tijolu kesi uza rai-mean.

Iha distritu Likisa no Ermera ho programa ne’ebe SEPFOPE implementa komunidade sira bele produs tijolu kesi 300 too 400.


Komunidade sira hala’o treinamento durante fulan 6 nia laran no konsege produz ona tijolu kesi hamutuk 12.000.

No comments:

Post a Comment

Related Posts Plugin for WordPress, Blogger...