Diskursu Sua Exselensia Primeiru Ministru Kay Rala Xnana Gusmão






Diskursu
Sua Exselensia Primeiru Ministru
Kay Rala Xnana Gusmão
Iha okasiaun sesaun plenaria extraordinaria – diskusaun no
Votasaun iha jeneralidade ba proposta lei no. 15/III (3) Governu ne’ebe
Prosede primeira alterasaunba lei no. 2/2014, husi 5 fevereiru,
Lei orsamentu estadu 2014


Exselênsia, Presidente do Parlamento Nacional
Exselênsias, Vice-Presidentes Exselênsias,
Presidentes das Comissoens Especializadas
Distintos Deputados
Colegas Membros do Governo

Ha’u agradese ba oportunidade atu mai ohin, iha ne’e, tan haré katak foin hori bairuak deit mak ami komunika mai Parlamento Nacional atu realiza debate ida ne’e.  Ha’u apresia tebetebes komprensaun kona-ba sentidu urjensia ba debate ida ne’e, tamba, husi resultado nebé sei hetan, Governu bele kontinua nia actividades, ho laran kman ona.  Orsamento Jeral Estado nian ba 2014, tuir debate nebé klean no aprovado husi Parlamento, fó dalan ba levantamentu excesu 271 milhoens dólares, husi Fundo Petrolífero, atu kobre total despezas previstas (iha Orcamento né rasik).  Maibé artigo oitavu Lei Orsamentu Jeral Estadu nian ba 2014 dehan katak Governu labele halo levantamentu excesu né bain-hira, to’o final terseiru trimestre tinan ida ne’e, ezekusaun orçamental la atinje 75%.  Iha fim do terseiru trimestre, haré duni katak ezekusaun la to’o 50%, tan né Governu, em prinsípiu, labele hatún osan excessu né. Maibé, ezekusaun orsamental sei aumenta iha últimu trimestre, ho razoens tuir mai né:  - primeiru, Governu selu saláriu 13º. mês iha fulan Dezembro, nuné, despezas ho salários sa’e boot iha trimestre ikus;  - segundu, fatin sira foun iha administrasaun públika, nebé aprovadu ona no inklui iha orsamentu, husi inisiu do ano, sei preenxidas iha tinan tomak nia laran. Né katak, numeru funsionarius iha folha de pagamento, ka despezas ba salarius, sei sa’e iha final do ano;  - terseiru, projetus kapital desenvolvimentu balun hahú ona no sei hotu iha tinan ida né laran, maibé projetus sira né lori tempu atu hala’o no mós tenki fo tempu atu kontratores sira bele hatama pedidu pagamentu. Tan né, despeza kapital dezenvolvimentu baibain ás liu iha últimu trimestre, duké iha trimestres dauluk; - kuartu, prosesus akizisaun bens e servisus no itens kapital menor, husi ministérius, sempre demora to’o loron simu sasán sira né. Nuné mós, emprezas sira sempre lori tempo oitoan atu hatama facturas, no la haluha katak ministérius sira ho tan ministériu finanças presiza tempu atu prosesa pagamentu. Tuir né, ezekusaun rubrikas ba bens e servisus no kapital menor, baibain, sa’e maka’as iha trimestre ikus. Atu habadak, ezekusaun sei aumenta iha trimestre ida ne’e. Despezas sira né tenki selu. Karik Governo la halo levantamentu excesu nian, liu RSE, bele mosu situasaun nebé
Governu tenki transfere dívidas tinan ida ne’e nian ba tinan fiscal 2015, no, tamba uza hotu osan nebé iha Contas do Estado, saldu nebé tenki assegura ba Rezerva nian, sei la to’o 200 milhoens de dólares, tuir rekomendasaun Ministério das Finanças. Senhor Presidente Senhores Vice-Presidentes Distintos Deputados  Governo husu atu halo alterasaun ba númeru 5, artigo oito, Lei no. 2/2014, OGE tinan ida né nian, nebé hakerek hanesan ne’e: ‘Karik, to’o final terseiru trimestre, maka ezekusaun orsamental atinje 75%, Governu bele lolo liman ba transferensia husi Fundu do Petroleu, liu Rendimentu Sustentável Estimadu, hodi informa antes kedas ba Parlamento Nacional, no assegura mós rezerva 200 milhoens dólares iha Konta do Tezouro.’ Alterasaun nebé ami husu sei hakerek tuir ida né: ‘Bain-hira ezekusaun orsamental atinje 75%, Governu bele lolo liman ba transferensia husi Fundo do Petroleu, liu Rendimento Sustentável Estimado, hodi informa antes kedas ba Parlamento Nacional, no assegura mós rezerva 200 milhoens dólares iha Konta de Tezouro.’ Iha nebé lós maka halo revizaun né? Iha mudansa husi fraze ‘karik, to’o final terseiru trimestre’ ba liafuan ‘bain-hira’, hodi dada naruk deit tempo atu halo levantamentu liu RSE. Ami nia expozisaun motivus temi, ho klareza nebé tuir ona ami nia kbit hato’o, razoens kona-ba pedidu revizaun. Komisaun C afirma, iha pájina 7, katak ‘tamba Lei Orsamentu no Jestaun Finanseira, tuir nia baze ba rasiosíniu, iha padraun kontrolo kona-ba legalidade ba leis selu-seluk nebé la respeita Lei ida né (ka, Lei Orsamentu no Jestaun Finanseira nian), ho efeito katak kaer metin padraun né, bain-hira la halo tuir padraun né, sei konsidera la tuir lei tamba ofende ka viola Lei temi ona né (ka, Lei OGF, ho hanoin nudar Lei valor reforsadu). Né duni, la iha tan dúvidas katak, tuir artigu 34º. Lei Orsamentu no Jestaun Financeira nian, alterasoens orsamentais tenki obedese, ka haktuir, sá-ida maka temi iha kapítulu I no II norma, ka lei, né nian.’ Pasajem, nebé ha’u lê daudauk ne’e, la iha sentidu liu ou, karik iha, sentidu né la hasoru malu, ka ketak liu, ho ami nia proposta revizaun ba númeru 5, artigu 8º. Lei no. 2/2012, no la-ós ha’u mak bele halo komentárius kona-ba ne’e. Maibé, karik fó lisensa atu halo komentarius, haú nian mak né, tuir liafuan português dehan ‘kahur alhos ho bogalhos’, ka, iha tétum, ita bele dehan ‘tau masin mer ba kafé’, tamba artigo 34º. Lei no. 13/2009, nebé relatóriu Komisaun C mensiona, ko’alia kona-ba alterasoens orsamentais, hodi dehan nuné: ‘1. Governo bele aprezenta alterasoens ba Orsamentu nebé la’o hela, bain-hira sirkunstânsias bele justifika duni
2. Estrutura no konteúdo leis ba alterasaun orsamental né obedece, ka tuir, buat nebé hatete iha kapitulu I no II, iha nebé sei aplika normas hotu-hotu Lei né nian ho adaptasaun nebé presiza.’ Haré ba kapítulu I, kapitulu ida né define kona-ba ‘Conteúdo no Estrutura’ ba Orsamentu Jeral do Estadu, no kapitulu II fó sai regras kona-ba oinsá halo ‘Lei do Orsamentu do Estadu’.  Só kapitulo III, nebé Komisaun C la temi, maka ko’alia kona ‘Alterações Orçamentais’. Proposta ba revizaun Lei OGE 2014, nebé lori ita mai polémika ida ne’e, la mai, taxativamente, katak ho klareza ida nebé la halo ema bele hanoin oitoan katak bele, ha’u repete, la mai ‘aprezenta alterasoens ba Orsamentu em vigor’, katak orsamentu nebé la’o hela; tamba, karik ida ne’e duni, Governu tenki, tuir númeru 2 (nebé ha’u foin lê) dehan, aprezenta ‘estrutura ida’ kona-ba alterasaun Orsamentu, no estrutura né mak sei sai hanesan fundamentu ba lei ida nebé fó dalan atu halo alterasaun, ba Orsamentu. Komisaun C la konsidera artigo 4º. Lei no. 2/2014, kona-ba ‘Limite autorizado ba Finansiamentu OGE’, nebé dehan: ‘Tuir dalan no atu aplika sá-ida mak artigo 7º. Lei no. 9/2005, 3 de Agostu, tuir redasaun (ka hakerek foun) iha Lei no. 11/2011, 28 de Setembro (Lei Fundo Petróleu nian), montante ka osan-hira ba transferência husi Fundo do Petróleu ba tinan 2014, la liu 902,9 milhoens dólares no (transferência né) só bele hala’o depois-de kumpre sá-ida maka hakerek iha artigo 8º. Lei né nian.’ Bain-hira ita lê artigu no. 9 Lei no. 12/2011, kona-ba ‘Transferências nebé liu Rendimento Sustentável Estimado’, artigu né dehan nune’e: ‘Labele hala’o, iha kada tinan finanseiru, transferensias husi Fundu Petróleo, liu Rendimento Sustentável Estimadu, se Governo la aprezenta uluk kedas ba Parlamentu Nasional: a) Relatórios nebé alíneas a) no b) artigo kotuk nian refere ba;     (Alíneas sira né, ita bele hetan iha artigo 8º. Lei no. 9/2005, nebé hatete: ‘a) hodi espesifika rendimentu sustentável iha Tinan Fiskal, tempu nebé hala’o transferensia ida né; b) espesifika estimativa rendimentu sustentável iha Tinan Fiskal nebé foin liu’); b) Relatório ho estimativa ba montante nebé sei reduz ka diminu iha Rendimento Sustentavel Estimado ba ezersisius orsamentais nebé sei tuir mai, tamba transferensia ho montante nebé ás liu Rendimentu Sustentavel Estimadu, husi Fundu do Petroleo; c) Relatorio husi Auditor Independente, nebé sertifika (ka konfirma) estimativas kona-ba redusaun iha Rendimento Sustentável Estimadu, nebé alínea b) artigu ida né refere ba; d) Justifikasaun kona-ba motivus nebé lori atu konsidera nudar intereresse Timor-Leste nian, iha tempo naruk, atu hala’o transferensia montante ás liu Rendimentu Sustentavel Estimadu
Prerrogativas, ka regras ka kondisoens, sira né hotu ami kumpre tiha ona, bain-hira mai aprezenta proposta ba Orsamentu Jeral Estadu 2014 nian.  Ho ânsia atu husu ba Governo atu prova nesesidade urjênsia (ba revizaun numeru 5, artigo 8º.), maka halo Komisaun C fo hanoin, iha pájina 8 Relatoriu Komisaun nian,  katak ‘labele husik, duni, atu dehan lolós mós katak diskusaun iha Plenáriu só bele hala’o, diak liu, bain-hira Parlamentu Nasional simu ona konjuntu mínimu informasoens, nebé bele permite, depois-de ezame rigorozu no informado, atu haré ba urjensia nebé husu né’. No temi tuir mai katak ‘Governo tenki haruka hotu no labele exklui elementu ida deit’.  No Prezidente Parlamentu Nasional hakerek ba Governo, hodi husu ‘konjuntu mínimu informasoens’, nebé mosu iha lista boot ida nebé ami simu, no ha’u hakerek tuir né:  - tabelas ezekusaun orsamental kona-ba despeza no kona-ba reseita, iha Setembro, no projesoens (ka previzaun) desagregadas, husi categoria no item ida-idak, ba ezekusaun iha 31 de Dezembro 2014, ba fundus tolu no ba servisus no fundus autónomus;  - justifikativu ba situasoens kona-ba ezekusaun nebé ki’ik liu kona-ba reseita no kona-ba despeza ou kona-ba dotasoens nebé gasta hotu ona osan;  - informasaun kona ba ativu no pasivu Estadu nian;  - situasaun kona-ba empréstimus nebé Estado fó no nebé Estadu simu, iha tinan 2014;  - sertidaun ka documento nebé komprova hala’o lavantamentus husi Fundu Petróleo iha 2014, no informasaun kona ba Fundu né nia lala’ok iha tinan ida né laran;  - sertidaun, nebé hetan validade husi Banku Sentral, kona-ba cash flow iha Kontas Tezouro nian no iha Fundus Espesiais;  - informasaun kona-ba kumprimentu ba limite (20%) atu hala’o alterasoens orsamentu, husi servisus sira nebé la iha autonomia administrativa no finanseira;  - informasaun kona-ba persentajem ba ajustes directos (10% husi dotasoens orsamentais), nebé ministério ida-idak halo;  - informasaun detalhada kona-ba despezas nebé sai husi rezerva kontinjensia iha dotasoens ba Governo tomak.’  Buat hotu nebé ha’u temi né, maka fó duni sentido lolós ba expresaun ‘konjuntu mínimu informasoens’ no ha’u hakarak agradese, husi ha’u nia fuan tomak, ba Parlamento Nacional tamba laran luak tebes hodi la husu ‘konjuntu maximu’ informasoens. Ami hein deit bain-hira lós maka Parlamento husu ‘konjunto maximu de informasoens’.

Senhor Presidente
Senhores Vice-Presidentes
Senhores Presidentes das Comissões Especializadas
Senhores Chefes das Bancadas
Distintos Deputados

Ha’u hakarak husu ba Parlamentu atu haré ba relasaun nebé liga maka’as númeru 5 ho número 6, artigo 8º. Lei OGE tinan 2014. Número 6 dehan nuné: ‘Karik, iha terseiru trimestre nia laran, bele prevê ona katak ezekusaun orçamental to’o final do ano, sei
inferior ba 80%, tenki rectifika orsamento, entre fulan Julhu ho Setembro, hodi hatún ka diminui montante total’ (ka osan tomak OGE nian). Maski Governo mosu deit hanesan ezekutor simples ida, ami la hein deit atu
Setembro hotu, hodi informa ba Parlamento katak la iha orsamentu rectifikativu, tamba letra da lei dehan ‘entre fulan Julhu ho Setembro’.Nudar ezekutor ba programas, Governo la haluha katak OGE 2014, pratikamente, só hahú hala’o, ho ona base legal, iha fulan Marsu, hodi Janeiro ho Fevereiro la’o ho rejime duodésimus. Husi fulan Julho to’o Setembro, hodi mós hatene efikásia ita-nia mákina administrativa to’o iha nebé, Governo la tur deit, no, permanentemente, tenta halo previzoes kona ba despezas ke bele mosu ‘to’o final do ano’, atu hatene lolós tan-sá iha demoras hodi buka hakat liu problemas sira né no mós sa-ida mak la’o hela, hodi bele hatene kona-ba possibilidade ezekusaun ‘to’o final do ano’. Nuné bá mós, karik iha entendimentu nebé simples tebes kona-ba jestaun finanseira ninia relasaun ho jestaun ba programas nebé atu ezekuta, ka implementa, bele kedas hanoin katak, tamba la iha rectifikativu, sei la iha redusaun montante global, nebé hatudu katak sei iha despezas barak liu no, karik mosu despezas barak liu, tenki iha osan atu bele selu despezas sira né. ‘Kojuntu mínimu informasoens’ nebé Parlamentu husu, afinal, fila fali ba ezijênsia número 4, artigo 8º. Lei no. 2/2014, nebé dehan katak ‘Parlamentu Nacional sei hala’o debate trimestral, kona-ba ezekusaun orsamental husi ministeriu ida-idak, sekretaria de estado no fundo autónomo’ no, ha’u fiar, espírito lei né nian maka, atu evita ka impede duni atu labele ‘ignora katak Parlamento órgão fiskalizasaun ida, la ós fali atu halo jestaun administrativa’ ba relatórios nebé Governo haruka, iha final kada trimestre.Parlamento Nacional devia kestiona liu maka não kumprimentu ba númeru 6, artigu
8º., tamba, iha né, maka Parlamento bele husu ba Governo atu prova previzoens despesas; iha né, maka ‘konjuntu minimu informasoens’ sira né bele ajuda halo ‘ezame rigoroso no informado’, nudar Comissão C hakerek, iha pájina 8 ninia relatório. Bele hanoin katak fásil tebetebes implementasaun ba artigo 8º. no basta ko’a deit  271 milhoens ba ‘levantamento em excesso’, buat hotuhotu sei la’o diak nafatin. Se la iha ‘levantamentu excesu’ né, sei iha kortes iha fatin hotu-hotu, ne’e katak iha instituisoens Estado nian hotu-hotu, tamba hatudu la iha kapasidade atu ezekuta osan nebé aprovado iha Orsamentu Geral do Estado, ho ida né signifika tenki iha aprezentasaun ‘estrutura orsamental’ foun ida, né katak sei iha orsamentu retifikativu. Orsamento retifikativu sei define lolós iha nebe mak ko’a osan no osan hira maka ko’a, tamba falta kapacidade ezekusaun. Né tamba, só hosi aprezenta estrutura orsamental foun ida (rectifikativa nian), maka bele kaer, no ha’u empresta liafuan husi Komisaun C, ‘garantia ba transparensia no klareza finanseira, nebé artigo 22º. Lei Orsamento no Jestaun Finanseira hatete’, tamba, ha’u konkorda, nune’e maka bele ‘la lakon hanoin kona-ba funsaun atu garante kontrolo orsamental, nebé Parlamento Nasional tenki asegura’ – página 10, relatório Komisaun C. Orsamento retifikativu tenki, labele sés husi né, haré ba ezekusaun orsamental husi instituisoens hotuhotu Estado tomak nian, no ha’u sei fó sai análize ida né, atu hotuhotu bele hatene kona-ba karáter vinkulativu (ka kesi-metin) husi ‘estrutura orsamental’ foun, iha Orsamentu Jeral Estadu tomak nian, Retifikado ka Retifikativu nian. To’o 30 de Setembro tinan finanseiro ida ne’e, ezekusaun real, husi instituisoens Estado nian nebé ki’ik, mak tuir mai né:
Presidente da Repúblika - 56.3 % (ho obrigasoens 56.3 %)
Parlamento Nacional - 57.1 % (ho obrigasoens 57.5 %)
Tribunais - 43.3 % (ho obrigasoens 56.1 %)
Ministerio Público - 49.3 % (ho obrigasoens 68.5 %)
Comissao Anti-Corrupçãao - 52.5 % (ho obrigasoens 59.3 %)
Comissão Função Publica - 50.2 & (ho obrigasoens 54.8 %)
UNTL - 52.1 5 (ho obrigasoens 56.9 %)

Ha’u husu perdaun tamba konsidera Parlamentu Nasional iha kategoria ‘instituisoens ki’ik’ Estado nian, maibé ami la nega katak Parlamento Nasional segundo Órgaun Soberania ita nia Estado nian. Ezekusaun nebé ha’u aprezenta, husi órgãos sira né, hatudu katak iha 60% nia ókos.
Ho kuadru ohin né, ha’u hakarak hatudu deit katak ezekusaun orsamental la-ós, iha fatin nebé-nebé deit iha mundu, operasaun matemátika atu haré osan hira maka tenki gasta iha fulan ida, atu nuné, iha fim do ano, bele hetan nível ás ba ezekusaun, no ha’u hatene katak distintos deputados sira no, liuliu, membros Comissão C iha konhesimentu diak liu kona ba né. Nudar Chefe do Governo, karik ha’u hakarak dudu ba ezekusaun orsamento nebé lalais, liuliu iha área projectos fizikus, ha’u sei la konsentra esforsu tomak atu assegura kualidade ba obras, hodi toma duni medidas nebé tos ka todan kona-ba né, atu muda mentalidade de ‘halo por halo’ tamba osan iha.
Ita enfrenta dilema ida (katak, iha ita nia oin, iha dalan rua) no ita tenki hili entre ‘gasta lalais’ no ‘gasta ho diak’. Ha’u hili ida ikus, no atu assegura ha’u nia eskolha né, ami labele halai atu aprova lalais obras sira. Ema barak hakilar hasoru ami, kona-ba osan nebé aprovado iha OGE, nebé sai deit nudar previzaun despezas, ho osan real, ka lolós, nebé ami aprova ba ezekusaun obra ida nian; osan ida né, em temos jerais, sempre menos liu ida nebé aprovado husi Parlamento, tamba tenki tuir kritérius rigorozus kona-ba verifikasaundesenhos no BoQs.

Senhor Presidente
Senhores Vice-Presidentes
Distintos Deputados
Ha’u mós hakarak realça, ka foti iha ne’e, katak Komisaun C hatene rekonhese  duni ‘natureza ba kestaun ida né (kestaun revizaun ba Lei, iha númeru 5 artigo 8º.) no ninia importansia ba kondusaun destinos País nian’ e, iha né duni maka ita bele haré karakter urjensia husi ami nia pedidu (ba revizaun). Ou ita fó fatin ba actividades governo nian, kona-ba ezekusaun, atu ‘norma ne’e bele fó dalan ba flexibilidade boot liu’ ba ninia aplikasaun (relatório Komisaun C nian, pájina 7), ou ita sei hasoru dalan klot ida, iha ona fim do ano, la ós deit kona-ba posível ezekusaun fízika nebé ás no, tan né, ezekusaun orçamental mós, maibé mós Governo la iha kapasidade atu garante Reserva ho 200 milhoens iha Contas do Tesouro. Komisaun C, iha pájinas 7 ho 8, afirma katak, tuir discricionariedade atu interpreta kona-ba ‘estruturas orsamentais’ ho ‘konteudo da lei’ – matéria ne’e ha’u temi tiha ona iha kotuk – Parlamento bele ‘konsidera katak (Panorama Orçamental) bele suficiente (deit) ba análise preliminar ba pedido urjensia (husi Governu), maibé análize né sei inkompleta tebetebes no ho lakunas’. Iha pájina 6, husi ami nia ‘Panorama Orsamental’, ami aborda kestaun ‘Jestaun Osan no levantamento liu RSE’.Ha’u sei lê passajem ida né: ‘Rai saldu osan nebé boot liu la di’ak, tamba osan nebé hela iha Contas Governo nian sei hetan taxa juro ki’ik liu taxa de juros husi investimento nebé ita halo ba Fundo do Petroleo. Nuné, hatún osan barak ba Contas Governo nian la maximiza retornos husi investimentus, nebé ita halo husi Fundu Petroleo’. Ne’e, nudar  prinsípiu Jestaun Osan, ba Governo. No ha’u hakarak fó lembra ba distintos Deputados katak Governo, iha kada fim-doano, haruka Relatório anual Fundo Petroleo nian, iha nebé bele haré retornos sira nebé ita hetan husi investimento Fundo né. To’o Agosto tinan ida ne’e, retornos husi investimento Fundo nian, to’o ona 2 bilioens 700 milhoens dólares. Husi Janeiro to’o Agosto, retorno ne’e maka 600 milhoes dólares. Fundo do Petróleo hetan, to’o momento ida ne’e, besik 17

bilioens dólares, husi jestaun ida nebé hahú kedas ona iha 2005. Fila fali ba asuntu debate ohin nian, husi fatin seluk, ami dehan nuné: ‘Governo husu, husi alterasaun né, atu bele hetan autorizasaun hodi hatún levantamentu husi Fundo Petroleo liu RSE, to’o 271 milhoes, bain-hira ezekusaun orsamental atinje 75%.’ No importante tebes atu haré ba sá-ida mak hakerek tuir: ‘Montante final atu hatún sei depende  husi taxa ezekusaun, nível kobransa reseitas no mós husi nesesidade atu kaer saldo  minimu ida 200 milhoes dólares.’ – nebé Comissão C iha oportunidade atu lê iha pájina 9 Panorama Orçamental, nebé Governo haruka mai Parlamento. Ne’e katak, levantamento né la-ós operasaun imediata no total, tamba nunka hala’o hanesan né kona-ba montantes globais iha OGEs lubuk ida iha tinan-tinan kotuk. Se la gasta hotu, osan né sei hela nudar saldo, no sei sai hanesan fonte finansiamentu ida ba OGE tinan foun. Iha pájina 6 dokumento Governu nian, Tabela 4 hatudu ne’e momós, bainhira temi ‘uso saldo osan’ ho montante 400 milhoens, nebé mai husi tinan fiscal 2013, nudar fonte ba ‘financiamento OGE 2014 nian’. Ha’u tau kestaun ida ne’e, tamba Komisaun C husu, iha ninia ‘konjunto mínimu informasoens’, ‘certidoes kona-ba levantamentu husi Fundo do Petroleo no informações desempenho Fundo nian’ no ‘sertidaun nebé Banco Central tenki valida kona-ba osan nebé tama-sai husi Contas de Tesouro’. ‘Konjunto minimu de informasoens’ nebé boot né só iha fatin, bain-hira, tuir número 5, ho redasaun ida uluk ka revista tiha ona, artigo 8º. Lei OGE 2014, bain-hira Governo ‘informa antes kedas ba Paralamentu Nacional’ katak ‘sei lolo liman ba transferensia husi FP, liu RSE’.  Maibé la ós agora, iha nebé ami husu legalidade ba possibilidade atu halo pedido ba Parlamento katak sei hala’o levantamentu em excesso.

Distintos deputados
Ha’u husu lisensa, antes de hotu, atu ko’alia, tuir ha’u nia entendimentu nebé fraku tebes, kona-ba aplikabilidade, espírito no letra lei nian.Ha’u fiar katak distintos Deputados sira sei lembra didiak debates ho motivos, nebé lori ba redije artigo 8º. Lei OGE 2014. Ha’u dehan ha’u fiar, tamba distintos Deputados sira bele husu atu rona fila fali gravasaun sessoens hotuhotu iha Plenário, durante diskusaun OGE 2014.Sá-ida mak husi Governo, ami lembra maka, depois de koalia hotu kona-ba razoens nebé provoka ezekusaun fraka ba orsamento, bain-hira kompara ho hanoin nebé la sukat atu husu osan, Komisaun Ad Hoc, em prinsípio, deside tiha ona atu hatún montante global orsamentu, husi 1.5 ka 1 biliaun 700 milhoens dólares ba 1.3, nebé la konsegue, hodi aseita nafatin 1.5 ho ajustamentos nebé halo. Ho ona ne’e, iha Plenário, hotuhotu konkorda atu mantem 1.5 mil milhoens, ho kondisaun katak hotuhotu tenki esforsa atu dudu ritmo nebé diak liu ba ezekusan. Espírito artigo n’e nian maka, em jeral, husu responsabilidade boot liu ba linhas ministeriais no ba administrasaun públika, no, em partikular, ezije empenho no dedikasaun nebé boot liu iha implementasaun programas. Ho lian simples, ha’u bele dehan ‘dudu ezekusaun orsamental ho dinamismo nebé ás’. Letra lei nian maka reflecte husi liafuan sira nebé hakerek intensaun né. Ha’u rona ema dehan katak lei diak, ka eficaz, maka lei nebé bele aplika. Ita nia Estadu foin kompleta tinan 12, fulan hat liu ba. Ita halo lei atu orienta asoens, ka hahalok ka prática, ita nia mákina administrativa Estado nian, no ita yenki buka estuda didiak no beibeilky kona-ba leis sira né bele aplika ka lae. Persepsaun ida né mai husi ita nia persepsaun, nebé ita iha kona-ba realidade, nebé ita moris ba ka ita enfrenta. Iha kazu ida ne’e, efikásia ba númeru 5 hetan travaun husi kondisionalismus, nebé mosu iha realidade Estadu nian, ho deit tinan 12, no atu ultrapassa né, letra da lei tenki orienta ba flexibilidade de interpretasaun no aplikasuan. Ho hanoin ida ne’e maka ami mai husu, ba Parlamento Nacional, atu hadi’a tiha lacuna, ka impedimento, nebé iha, iha lei nebé ita halo ho intensaun nebé diak duni, maibé, realistikamente, la aplikável, ka ita labele aplika, karik nafatin ho ninia redasaun tuan.


Dili, 15 Outubru 2014

Kay Rala Xanana Gusmão

No comments:

Post a Comment

Related Posts Plugin for WordPress, Blogger...