Primeira Dama Husu SEPFOPE Sei Ajuda Hari Uma Ba Ema Kiak

DILI : Primeira Dama Timor-Leste servisu hamutuk ho Sekretariu Estadu Politika Formasaun Profesional no Empregu sei hari uma ba ema oan kiak sira iha area Akadiruhun Dili.

“Ami mai halo kordenasaun ba programa aktividade servisu nebe uluk primeira dama husu atu hadia uma ema faluk oan kian sira hadia baleta sira iha Bidaun Akadiruhun nian nebe tinan kotuk ami serfei ona,” informa Sekretariu Estadu Politika Formasaun Profesional, Ilidio Ximenes da Costa, hafoin halao inkontru ho Primeira Dama Isabel Ferreira iha Palasiu Prezidente Aitarak-Laran Dili, Tersa (04/03).

Ilidio dehan, SEPFOPE pronto atu ajuda Primeira Dama hodi implementa nia programa fo tulun povu kiak sira nomos rezolve problema ba impregu rural nian tuir mos kalanedariu programa SEPFOPE nian.

Nia dehan, hahu tinan 2014 ba oin, SEPFOPE sei ajuda hadia uluk uma ba povu kiak nebe identifika ona.

Tuir Ilidio katak, programa no hanoin nebe impoin husi Primeira Dama Isabel importante tebes hodi redus mos numeru dezempregu iha TL.

SEPFOPE rasik sei haruka juventudi sira nebe tuir ona formasaun iha Becora maka sei tun direitamente ba ajuda hadia uma ba povu kiak sira.

“Ita nia alin sira nebe prepara ona iha sentru formasaun maka sei tun ba ajuda nudar filosofia ida katak, oan tenki ajuda inan sira,” tenik Ilidio.

Molok implementa programa ne’e, Primeira Dama sei konvida hikas SEPFOPE hodi kordena mos ho ministeiru balun hanesan Ministeiru Obras Publika bele ajuda hadia dalan tuir rekomendasaun nebe povu hato hanesan hadia ponte, liga kanalizasaun be’e mos no seluk tan.

SE-Ilidio hatutan, primeira dama loke dalan mos ba emprezariu Timor oan no internasional nebe hakarak ajuda material no finanseiru bele ajuda direitamente hamutuk ho Primeira Dama no SEPFOPE.