Setor Privadu Fo Importansia Ba Traballador Timor-oan

Joven sira buka informasaun kona ba vaga serbisu hodi bele kompete iha prosesu rekrutamentu.

Prezidente Camara Comercio Industria Timor Leste (CCI-TL) Oscar Lima hatete, setor privadu durante ne’e fo liu importansia ba traballador Timor-oan atu servisu. “Iha setor privadu 75% ami tau importansia liu ba traballador Timor-oan duke ema husi rai liur, tanba traballador rai liur ita selu karun liu, ita lahatene lukru,” dehan Oscar Lima ba Jornalista sira iha CCI-TL Acait, Kinta (8/1), hodi hatan ba sujestaun SEPFOPE atu simu formandu sira iha setor privadu.

Nia informa, foim dau-dauk ne’e CCI-TL, Sindikatu Traballador no ILO tur hamutuk koalia konaba kapasitasaun mentalidade traballador sira nian. Presija kapasitasaun ba mentalidade, tanba mentalidade mos factor importante ba setor privadu. Basa mentalidade ida ne’ebe baruk ten, foti an no seluk tan ne’ebe susar ba setor privadu sira atu emprega.

“Buat ida mentalidade ita iha Timor ne’e hau hare ladun diak, kuandu mentalidade ladun diak ema barak atu emprega nia ba servisu ne’e ema tauk, tanba primeiru nia tama mai nia hakraik an, Segundu nia foti an depois dehan veteranus ida ne’e nia oan no seluk tan hodi servisu lao. Lia mate mos la hotu hela deit ne’ebe halo ferias barak liu tanba kompanhia bele selu bainhira iha benefisiu,” hatete nia. Antes ne’e Sekretariu Estadu Politika Formasaun Profesional Empregu (SEPFOPE), Ilidio Ximenes reafirma katak, formasaun ba juventude kontinua lao no sei aumenta tan, importantemak kria kampu de traballu, tanba bainhira SEPFOPE forma ema, maibe setor privadu labok an mak sei hamosu problema, tanba programa ne’e iha ba malu.