Viqueque – Komunidade sira iha
Suku Maluro, Sub-distritu Viqueque Vila, distritu Viqueque, entrega rai ektare
1,5 ba Sekretariu Estadu ba Politika Formasaun Profesional no Empregu
(SEPFOPE).
Komunidade sira entrega rai ne’e
ba SEPFOPE hodi harii Sentru Formasaun iha sira nia area.
Komunidade sira iha suku ne’e ho
hakarak rasik konvida Sekretariu Estadu Ilidio Ximenes da Costa hodi entrega
rai gratuita.
Sekretariu Estadu ne’ebe
akompana husi Diretor Nasional Empregu Paulo Alves no xefe departamentu
Auto-empregu Lucio Beretasi hakat ba Suku ne’e hodi hala’o serimonia entrega
rai.
Administrador sub-distritu
Viqueque Vila akompana husi Xefe Suku Maluro no Komandante PNTL Viqueque
entrega rai ba Sekretariu Estadu Ilidio liu husi serimonia adat ho esperansa
atu prosesu dezenvolvimentu ba nasaun ne’e sei susesu liu husi programa ne’ebe
SEPFOPE implementa.
Komunidade Maluro ho haksolok
simu prezensa SEPFOPE no entrega rai hodi bele utuliza ba sentru treinamentu ba
juventude iha suku ne’e nune’e iha tempu oin mai sira bele iha abilidade hodi
partisipa iha prosesu dezenvolvimentu.
Molok ne’e komunidade sira husi
distritu Oekusi no Maliana entrega mos rai ba SEPFOPE hodi harii sentru
formasaun.
Sekretariu Estadu hatete SEPFOPE
sei utuliza rai ne’ebe komunidade entrega hodi oferese matenek no abilidade ba
komunidade sira liu husi treinamentu hirak iha sentru formasaun ne’ebe sei
harii.
Iha oportunidade ne’e Sekretariu
Estadu entrega mos revista Empregu edisaun dahuluk ne’ebe SEPFOPE produs ba
komunidade sira.
Objetivu husi fahe Revista ne’e
atu komunidade sira bele akompana informasaun kona-ba servisu no atividade
hirak ne’ebe SEPFOPE hala’o.
No comments:
Post a Comment