Programa Seasonal Workers Program (SWP)

SEPFOPE halao reuniaun ho Departamentu Empregu Australia hodi diskute kona ba programa Seasonal Workers Program (SWP), delegasaun husi SEPFOPE ne´ebe kompostu husi Xefi Gabinete Benigno da Cruz, Direktur Nasional Kolokasaun Empregu Frederico Pereira Matos, Direktur Nasional Administrasaun Finansa Rogerio Mendonça, Xefi Departamentu Empregu Rai liur Valencio de Jesus, no Adidu trabalho ba Australia Ismenio Martins da Silva no adidu trabalhu foun ba Australia  Filipe Mesquita halao sorumutu ho Departamentu Empregu Australia hodi diskute konaba programa Seasonal Workers Program (SWP) iha edifisiu Ministeriu Trabalhu Australia.

Molok hahu reuniaun Delegasaun ne´ebe xefia husi Xefi Gabinete SEPFOPE, hato´o agradesementu ba Departamentu Empregu Australia ne´ebe mak bele simu delegasaun hodi diskute kona ba programa SWP entre Governu Australia no Governu Timor Leste ne´ebe mak estabelese ona, iha tempu ne´e mos halo mos introdusaun ba Direktor Jeral Mark Roddam no Direktur Nasional Empregu Susannah Smith ho ekipa kona ba objektivu husi visita ofisial no enkontru refere mak hanesan partisipa iha serimonia entrega servisu husi adidu trabalhu tuan ba adidu trabalhu foun inklui mos halo introdusaun ba Departamentu Empregu Australia ba kargu foun husi Sr.Valencio Anes de Jesus hanesan Xefi Departamentu Empregu Exterior truka pontu fokal Empregu Exterior Sr.Frederico Pereira Matos, Benigno da Cruz iha introdusaun ne´e husu mos ba Departamentu Empregu Australia nian atu bele kontinua kria kooperasaun no koolaborasaun ne´ebe mak diak ho adidu trabalhu foun Sr. Filipe Mesquita, no hato´o mos kooperasaun ne´ebe mak SEPFOPE hala´o ho Banku Nasional iha Timor Leste hodi hare´e konaba retornu ( remitance) ne´ebe mak trabalhador sira haruka mai familia iha Timor Leste.

Durante reuniaun husi Direktur Jeral husi Departamentu Empregu Australia Sr. Mark Roddam hato´o apresiasaun ba Governu Timor Leste liu husi SEPFOPE ne´ebe mak hala´o kooperasaun  diak tebes ho Ministeriu Trabalhu Australia nian iha reuniaun ne´e mos husi departamentu Empregu Australia diskute ho delegasaun SEPFOPE konaba numeru trabalhador Timor Leste iha Australia ne´ebe ki´ik kompara ho nasaun Korea do Sul  ne´ebe mak iha planu sei aumenta numeru trabalhador iha tinan ida ne´e no koalia mos konaba oinsa bele kria mekanismu diak ba prosesu visa nian, informasaun kona ba area servisu ne´ebe sei aumenta iha tinan ida ne´e inklui visita ofisial husi Departamentu Empregu Australia mai Timor Leste iha fulan Maiu tinan 2014, no Direktur Jeral ne´e mos akresenta apresiasaun ba SEPFOPE ne´ebe mak hahu hala´o ona peskiza kona ba retornu (remitance) ho trabalhador Timor iha Korea no tenik liu tan katak SEPFOPE lori programa ne´ebe foun no diak ba Departamentu Empregu Australia.

Durante visita iha ofisial iha Australia delegasaun SEPFOPE iha loron 28- Marsu – 2014, delegasaun hamutuk ho Embaxador Timor Leste ba Australia Sr. Abel Guterres iha edifisiu Embaixada Timor Leste Canberra Australia  hala´o serimonia entrega servisu (hand over) husi adidu trabalho tuan ba adidu trabalhu foun Timor Leste ba Australia ne´ebe mak partisipa husi Deprtamentu Empregu Australia, Departamentu Imigasaun, Departamentu husi Negosiu Estranjeiru AUSAID, AUSTRADE, Departamentu Turismu Australia, Empresa ne´ebe mak fo servisu ba Timor oan iha Australia, no Familia bo´ot Timor oan ne´ebe hela iha Canberra Australia.

Introdusaun husi Ismenio Martins da Silva hato´o agradesemntu bo´ot ba fiar husi SEPFOPE hodi asume kargu nudar adidu trabalhu, liu husi delegasaun ne´ebe xefia husi Xefi Gabinete, adidu trabalhu ne´e realsa mos katak apoiu, koolaborasaun no kooperasaun ne´ebe mak durante ne´e kria ona ho instituisaun relevantes ho servisu adidu trabalhu nian agradese tebes.

Iha serimonia ne´e  mos husi instituisaun ne´ebe mak sempre hala´o servisu ho adidu trabalhu hanesan Deprtamentu Empregu Australia, Departamentu Imigasaun, Departamentu husi Negosiu Estranjeiru AUSAID, AUSTRADE, Departamentu Turismu Australia, inklui Empresariu sira hato´o  mos sira nia apresiasaun ba adidu trabalhu nia progresu servisu durante asume kargu nudar adidu trabalhu iha nasaun Australia no kooperasaun ne´e be mak diak tebes no sira prontu atu kontinua kopera ho adidu trabalhu foun ba Australia.

Xefi Gabinete ne´ebe representa SEPFOPE hato´o apresiasaun ba apoiu husi Sr. Embaxador Timor Leste ba Australia ne´ebe fo apoiu tomak ba programa Seasonal Workers Program ( SWP) hamutuk ho adidu trabalhu iha Australia, no mos ba kordenasaun ne´ebe mak diak ho instituisaun relevantes ho asuntu empregu iha Australia nian no familia Timor oan ne´ebe mak iha Australia fo apoiu tomak ba programa SWP liu husi adidu trablahu Ismenio Martins da Silva durante halao servisu iha ne´e tamba ne´e lori instituisaun SEPFOPE nia naran hakarak hato´o ami nia agradesementu bo´ot ba apoiu sira ne´e, iha oportunidade ida ne´e mos hakarak husu nafatin kooperasaun no koolaborasaun ne´ebe diak ho adidu trabalhu foun Filipe Mesquita ne´ebe mak sei hala´o fila fali kna´ar nudar adidu trabalhu iha Australia, no hakarak agradese mos ba Departamentu Empregu Australia ne´ebe mak iha ona planu atu bele aumenta numeru trabalahador Timor oan iha tinan ida ne´e, no konvida mos  ba konvidadus sira katak Timor Leste nasaun ne´ebe ki´ik no nakloke ba ita bo´ot sira hotu hodi bele ba visita iha Timor Leste hodi hare´e besik liu tan potensia saida mak Timor Leste iha, ambiente inklui prosesu desenvolvimentu iha ami nia rai.

Serimonia hand over ne´e mos Embaxador Timor Leste ba Australia Abel Guterres hato´o nia apresiasaun ba Ismenio Martins da Silva ne´ebe mak halao servisu ho diak tebes durante asume kargu nudar adidu tarabalhu iha Australia no bemvindu ba adidu trabalhu foun mai iha Australia iha ne´e ami prontu nafatin atu koolabora no koopera ho adidu trabalhu foun Filipe Mesquita durante hala´o kna´ar iha Australia atu nune´e bele fo susesu nafatin ba programa Seasonal Workers Program (SWP) iha nasaun Australia hodi nune´e ita bele hamenus numeru kiak no desempregu iha ita nia rai  Timor Leste, fiar katak ho adidu foun espiritu foun bele halao diak liu tan programa ne´ebe mak hala´o ona husi adidu tarabalhu tuan.