Suku Rua iha Oekusi “Troka” Rai ho Sentru Formasaun


OEKUSI Komunidade sira husi suku Cunha no Lalisuk, Sub-distritu Pante Makasar, Distritu Oekusi entrega rai ektar ida (1) resin ba Governu hodi harii Sentru Formasaun.

Rai ne’ebé komunidade entrega ba governu hanesan uluk iha tempu UNTAET utuliza hanesan Merkadu, maibé tanba la uza, komunidade sira ho lider lokal entrega ba governu hodi hari Sentru Formasaun.

Xefe Suku Cunha, Abilio Asquilin hatete, merkadu ne’ebé mak sira entrega ba governu ne’e ho hanoin ida atu dezenvolve joventude sira nia kapasidade no esperensia liu husi formasaun professional hodi bele preparan aan ba iha merkadu, liu-liu ba projetu Zona Ekonomia Espesiál Sosial Merkadu (ZEESM)ne’ebé sei halo iha Oekusi iha tinan ida ne’e.

Fatin (merkadu) ne’e ami entrega ba SEPFOPE atu mai loke sentru formasaun ida iha ne’e, tanba durante ne’e ami la uza ona merkadu ne’e,” dehan Abilio.

Durante ne’e, tuir nia, bainhira hakarak tuir formasaun ruma, juventude sira iha Oekusi tenke ba hotu Dili.

Merkadu ne’ebé mak entrega ba governu ho medida maizumenus ektare ida (1) ho total uma hamutuk 4 no kompletu ho sertifikadu rai nian.

Komunidade sira ne’ebé reprezenta husi Xefe suku Cunha no Xefe suku Lalicuk, Jorge Costa entrega direitamente ba Primeiru Ministru Kay Rala Xanana Gusmão, hodi fó kedas ba Sekretariu Estadu Politika Formasaun Profesional no Empregu, Ilidio Ximenes da Costa.

Tuir planu, iha tempu besik nia laran SEPFOPE sei utiliza fatin ne’e atu loke sentru treinamentu ba joventude sira ne’eb’e kompletu ho dormitoriu ba formandu no treinadór sira.

PM Xanana agradese ba komunidade sira nia komitementu tanba ho laran luak oferese fatin.
“Iha tempu besik nia laran, ha’u sei haruka Ajensia Dezenvolvimentu Nasionál (ADN) atu bele mai halo konstrusaun ba moru, atu nune’e bele asegura kondisaun fatin ida ne’e,” promete PM Xanana.
PM Xanana kontinua dezafia autoridade suku, no komunidade, liliu juventude sira atu bele aproveita didiak oportunidade hodi tuir formasaun bainhira programa ne’e la’o susesu ona.

Ida ne’e hanesan parte ida atu ajuda imi (joven) sira hateke ba oin hodi dezenvolve rai Oekusi”, dehan PM Xanana.

Iha fatin hanesan, Eis PM no atual Koordenador ba ZEESM Mari alkatiri dehan, daudauk ne’e Oeksui komesa ona hetan atensaun husi mundu internasionál, liliu emprezariu sira, tamba ne’e husu labele fa’an rai arbiru ba ema.

“Tanba kuandu imi fa’an hotu, simu tiha osan mai gasta hotu, imi mak sei sai fali penonton no ema liur mak sei aproveita fali,” katak eis PM ne’e.

Entretantu, Sekretariu Estadu Ilidio apresia komunidade Suku Cunha no Lalicuk tanba iha honoin hodi partisipa iha desenvolvimentu Oekusi no oinsa sira nia preparasaun ba ZEEMS liu husi formasaun professional.

Nia dehan, serimonia entrega rai ne’e bele fó ona dalan atu oinsa bele redus joven sira atu ba iha Dili.

No comments:

Post a Comment

Related Posts Plugin for WordPress, Blogger...