SEPFOPE Apoiu Bidon ba Grupu Moris Foun


OEKUSI – Sekretariu Estadu ba politika Formasaun Profesional no Empregu (SEPFOPE) entrega Bidon rua (2) no masa boot rua (2) ba grupu Moris Foun hodi halo produsaun Minyak Kayu Putih.

Grupu Moris Foun, nu’udar grupu ida ne’ebé harii ona iha tinan hirak ba kotuk ho membru hamutuk na’in 12, iha Suku Nipani, Sub-distritu Pante Maksar, Distritu Oekusi.

Sekretariu Estadu Ilídio Ximenes da Costa dehan, apoiu ne’ebé fó ba Grupu ne’e laos tama iha Orsamentu Estadu maibé nia ho funsionariu SEPFOPE mak tau hamutuk osan hodi sosa material ba grupu ne’e.

Durante ne’e, grupu Moris Foun enfrenta difikuldade ba material hodi apoiu produsaun Minyak Kayu Putih.

Ho apoiu ne’ebé SEPFOPE fó bele ajuda netik sira hodi kontinua hala’o sira nia atividade ne’ebé paradu ona.

“Afinal sira presiza de’it bidon boot rua hodi tein no ki’ik rua hodi ense bee ba laran,” dehan SE Ilídio hafoin entrega apoiu.

Ilídio husu ba grupu ne’e atu hatama proposta ba SEPFOPE atu nune’e oinsa bele moderniza sasan ne’ebé grupu ne’e uza hodi fasilita serbisu.

Nia dehan, SEPFOPE mós sei buka meius hodi fó formasaun ba membru iha grupu ne’e atu sira nia kapasidade hodi bele produs barak.

Kordenadór ba Grupu Moris Foun Martinho Seran hatete, hafoin tinan 2007 sira para ona produs tanba material ne’ebe sira uza aat hotu.


Nia agradese ba SEPFOPE tanba bele ajuda grupu ne’e atu produs hikas Minyak Kayu Putih.

No comments:

Post a Comment

Related Posts Plugin for WordPress, Blogger...