SEPFOPE Despedida Traballadór Timor-Leste Ba Korea Ho Austrália

Sekretáriu Estadu Polítika Formasaun Profissionál no Empregu (SEPFOPE) despedida tan traballadór nain 21 hodi ba servisu iha Korea do Súl no Austrália.

Iha seremonia despedida ne’e Sekretáriu Estadu Ilídio Ximenes hameno katak, nudar nasaun ida ne’ebé mós iha riku soin timor oan presiza hetan esperensia barak husi rai seluk, tanba ne’e SEPFOPE haruka traballadór ba rai liur hodi hetan esperensia.

“Haruka traballadór sira ba iha rai liur ne’e la’os dehan katak governu la iha kapasidade, maibé matenek ita iha, mais ou menus ita presija kapasita ita nia an tanba ne’e imi (traballadór) sira ne’ebé atu ba iha Korea do Súl no Australia ne’ebá la’os individual, maibé ita boot sira nudar delegasaun TL nomós hanesan  Embaixador TL nian ne’ebé lori kultura TL nian hodi ba habelar iha rai liur tanba liu husi kultura bele hametin ligasaun bilateral entre nasaun sira ne’ebé ita servisu ba,” Ilídio Ximenes da Costa hameno ba traballadór sira iha salaun enkontru SEPFOPE, Segunda (18/3).

Ilídio kontinua husu atu traballadór sira ne’e kumpri regulamentu kompañia nian, inklui tenki hatudu identidade Timor nian hodi hatudu komportamentu ne’ebé diak hodi nune’e nafatin loke dalan ba jerasaun tuir mai ne’ebé sei ba tuir.

            Iha fatin hanesan Embaixador Korea DH. Hyan Kyun hateten, traballadór Timor oan sira tenki hatene realidade esperensia Korea nian ne’ebé antes ne’e mos nasaun ida ne’e kia’ak, maibé dadauk ne’e sai ona nasaun ida ne’ebé dezenvolvidu tanba uluk mós juventude Korea nian sai ba servisu iha nasaun seluk, hanesan Alemanha, Saudia Arabia, Irak, Iran no Libia.

            Entertantu Reprejentante Embaixador Australia Alexandra Owen afirma, dada Australia  traballadór Timor oan seidauk barak maibé espera katak tinan-tinan númeru traballadór sira ne’ebé ba iha Australia aumenta.

            Alexandre husu ba traballadór timor oan sira ne’ebé atu ba iha Australia at aprende mos lian ingles no seluk tan liu-liu iha seitor Turizmu nian atu nune’e bainhira remata kontratu bele fila mai servisu iha area Turizmu ho diak liu tan ho esperansa ne’ebé sira hetan iha Australia.

            Traballadór nain 21 ne’e nain 8 ba iha Korea no nain4 seluk ba Australia e ba Korea  do Súl sei ba servisu iha area Peskas no Agrikultura no ba iha Australia sei servisu iha área Ospitalidade. JN DIÁRIO