Komunidade Funar Kontenti Hetan Estrada Diak Husi SEPFOPE

Laklubar : Komunidade suku Funar Sub-Distritu Laklubar Distritu Manatuto senti kontenti no agradese ba iha Guvernu liu husi Sekretaria Estadu ba Politika Formasaun Profisional no Empregu (SEPFOPE), tamba tulun ona sira hodi loke estrada ligasaun husi Sun Distrito Laklubar ba Suco Funar. .

“ami fo agradese boot ba iha Sekretariu Estadu Ilidio Ximenes da Costa ne’ebe mak tau matan ona mai ami hodi loke estrada ligasaun husi Sub Distrito Laklubar ba iha Suco Funar, dehan, Xefe Suku Funar Franscisco liu husi nia intervensaun ba iha serimonia inagurasaun estrada ne’ebe mak loke husi SEPFOPE. Iha Sesta (17/10) semana ne’e.

Ne’eduni hodi komunidade tomak husi suku Funar nia naran hakarak hatoo agradese wain ba iha SEPFOPE ne’ebe mak fo ona laran hodi autoriza kompania Lafafama hodi ba loke dalan ligasaun husi Funar nian ba iha Laklubar vila. Nia dehan, antes ne’e povu funar labele halao sira nia aktividade ho diak

povu iha Funar labele moris iha vida ekonomia ne’ebe mak diak tanba Estrada mak sai hanesan impedementu, no halo povu sira lakon esperansa atu involve-aan dezenvolvimentu ekonomia ne’ebe mak diak. Tanba komunidade iha suku refere maioria moris ho vida agrikultura no negosiu mak hanesan Kafe, Tua, Fore rai modo no seluk tan.

Maibe dezenraska ba sira atu lori ai-han sira ne’e ba kompete iha merkadu hodi fan ba hetan osan tan deit Estrada ne’ebe mak ladiak halo sira tenki lao ain ho kilo metrus ne’ebe mak dook no dala ruma to’o iha bazaar, kompradores sira laiha no merkadu mos komesa mamuk ona. Ne’e hanesan dezafiu bo’ot ba sira atu hadiak sira nia vida moris tanba Estrada mak sai fali hanesan impedimentu boot ida ba iha sira nia vida moris.

Alinde ne’e eskola oan sira mos tenki sofre tanba atu hetan merendah eskolar ho pasiensia tenki lao ain ou ho kuda ba lalin fali husi laklubar vila hodi ba iha funar no dala ruma loron ida tomak lalin la hotu.

Ne’eduni ho Estrada no dalan foun ne’ebe mak oferese ona husi SEPFOPE sira senti kontenti no agradese tebes tanba hamenus ona sira nia enerzia hodi lao ain nune’e mos tulun ona sira atu compete iha dezenvolvimentu ne’ebe mak diak. Iha fatin hanesan, komunidade Antonio da Silva (38), Roke do Esperito Santo mos senti kontenti ho Estrada foun no agradese ba guvernu konstitusional tanba bele fasilita ona sira atu utiliza Estrada no dalan ne’ebe mak diak.

Tanba antes ne’e Estrada laiha araska ba sira hadiak sira nia moris tanba atu halo uma deit tenki lalin rai henek to’o fulan ida ou rua nia laran mak foin halo uma ida maibe agora laiha ona hakarak halo uma no sosa sasan ba faan hein kareta mak tula deit tanba Estrada diak ona.

Antonio Alves mos senti kontenti tanba agora nia bele ona loke kios ho diak tanba sasan kios sei la lalin tan ona maibe kareta mak sei lalin tanba Estrada diak ona. Entertantu Estrada ne’e rasik loke husi kompania Lafafama ne’ebe mak kaer husi prezidenti kompania Domingos Sarmento Soares ho montante osamentu hamutuk 497 Mill (Quatro Centos Noventa Sete Mill) ho durasaun tempo tinan 1 no estrada ne’e rasik halo liu husi ai-moruk EcoCure.