BAUKAU : Dili Institut of Technology
(DIT) hamutuk ho Sekretariu Estadu ba Politika Formasaun Profesional no Empregu
(SEPFOPE) rejional Baukau, Kinta (03/04), halo ona selesaun ba
joventude feto no mane ne’ebé hakarak tuir formasaun iha área karpintaria ho
pedreiru.
Joven feto no mane ne’ebé
kompete iha selesaun ne’e hamutuk na’in 58. Husi númeru
ne’e, ema na’in 40 mak pasa. Feto na’in 17 no mane na’in 23.
“Prosesu rekrutamentu ne’e servisu
hamutuk ho xefi suku neen (6) hanesan: Suku Buibau, Bahú, Wailili, Caibada 2 (Caibada
Makassae), Tirilolo, Seiçal no Sub-Distritu Laga (Soba) no Sub-Distritu
Quelicai (Suku Laisorulai de Cima),” dehan Diretór SEPFOPE Rejional Baukau,
Romualdo Antonio de Sousa foin lalais, iha ninia kna’ar fatin.
Tuir Romualdo, naran joventude
sira ne’ebé liu iha selesaun, iha tempu badak sei taka iha kuadru avizu CEOP (Centru
Empregu Orientasaun Profisionál) Baukau hodi nune’e sira bele kompleta sira nia
dokumentus. Tuir orario, formasaun sei hahú iha 05 Maiu 2014.
Formasaun ne’e, hetan orsamentu husi SEPFOPE ho nia
parseiru ADB (Asian Development Bank).
Orsamentu ne’e, sei fasilita joven sira atu tuir formasaun ho di’ak to’o
remata, kada loron ema ida sei hetan osan transporte ho osan hahaan meudia hamutuk $ 4.00.
Kriteria husi SEPFOPE nasionál
ho parseiru dezenvolvimentu (ADB) mak juventude sira bainhira tuir formasaun
tenke to’o remata no hatudu displina, komportamentu di’ak no pontualidade.
Karik iha loron ikus juventude feto no mane viola regulamentu hirak ne’e nia
sansaun sei devolve fali osan hirak ne’ebé mak sira simu tiha ona.
Iha fatin hanesan,
Diretór DIT Baukau dehan selesaun dokumentus agora dadaun remata ona no sei
entrega ba CEOP Baukau atu fó sai avizu.
“Kandidatu sira ne’e agora
dadaun prepara ona no DIT sei ba konfirma ho SEPFOPE Nasionál ho ADB para
haruka ona ekipamentu ba formasaun iha DIT Baukau,” dehan Diretór ne’e.
Objetivu husi formasaun ne’e
atu fó kapasitasaun ba juventude sira iha área konstrusaun sivíl hodi prepara
joven sira ba iha merkaduria. FragaCeles/www.sepfope.gov.tl
No comments:
Post a Comment