SEPFOPE Halo Rekrutamentu ba formasaun Vokasional

Ekipa Sekretariu Estadu ba Politika Formasaul Profisional no Empregu (SEPFOPE) Oecusse hamutuk Sentru Formasaun akreditadu halo rekrutamentu ba juventude sira atu tuir Formasaun Vokasional ba area Konstrusaun no Automotivu iha SEPFOPE Regional OeCusse, Tersa (22/05).

Ekipa SEPFOPE, kompostu husi INDMO, DNAFOP, LMI, no ADB hamutuk ho sentru formasaun akreditadu rua (2) mak hanesan CNEFP (Tibar) no sentru formasaun Don Bosco (Comoro), iha oportunidade ne’e kolabora hamutuk hodi hala’o prosesu rekrutamentu ba kandidatu sira atu tuir formasaun vokasional iha area konstrusaun no automotivu iha Distritu Oekusi. Antes atu hala’o prosesu ida ne’e, ekipa SEPFOPE Nasional halo ona  linha kordenasaun ho SEPFOPE Regional, Autoridade regional Oecusse, Administrador Sub – Distrito sira, Chefe do Suco sira no inklui mós Juventude sira ho objetivu atu bele fasilita prosesu ne’e ho diak.

Molok atu hala’o prosesu rekrutamentu ne’e, sei iha seremónia abertura ne’ebé loke husi Sekretário Estado SEPFOPE, Ilidio Ximenes da Costa, iha diskursu ne’e Secretário Estado  informa katak iha tempu ida ne’e nia kontenti teb-tebes tamba juventude Oekusi iha antusiasmu maka’as atu tuir formasaun e tempu ne’e hanesan tempu ne’ebé especial ba juventude Oecusse  oan sira atu kapasita sira nia-an liu husi formasaun ida ne’e, durante prosesu rekrutamentu nia laran SEPFOPE sei la halo diskriminasaun ba kandidatus sira (sei la haree ba kor maibe hare ba ema nia kapasidade).

Ilidio Ximenes da Costa, informa tan katak relasiona ho programa ZEEMS, agora dadaun SEPFOPE servisu hamutuk ho ZEEMS hodi dezenvolve sira nia rain, tamba ne’e juventude Oekusi oan sira tenki esforsu nafatin liu husi teste eskrita no intervista hodi ba tuir formasaun vokasiónal iha Distrito Dili.

Objetivu husi rekrutamentu ne’e mak atu prepara joventude Oecusse oan sira antes implementa projetu  ZEEMS. Iha parte seluk, katak atu hametin relasaun Institusional entre SEPFOPE Nasional no Regional, no mós fo oportunidade ba Oecusse  oan sira hodi maximiza sira nia kapasidade iha area formasaun vokasional, liu-liu ba area konstrusaun no Automotivuiha sentru formasaun vokasional akreditadu Tibar (CNEFP) no Don Bosco (Comoro).

  Prosesu rekrutamentu ne’e implementa ba fase 2; primeira fase; kona ba prosesu konsultasaun ba identifikasaun dadus, segunda fase,prosesu rekrutamentu liu husi prova eskrita (literásia no numerásia) no mós Intervista. Prosesu rekrutamentu ne’e kompostu husi ekipa/panel 5, kada panel kompostu husi membru nain 2. Partisipantes ne’ebé mak partisipa iha prosesu rekrutamentu ne’e mak hamutuk 194 pesoas, representante husi sub – distrito 4, suku 18.

Relasiona ho rekrutamentu ne’ebé ekipa panel SEPFOPE hala’o dadaun iha Distrito Oecusse  ne’e, fase tuir mai seidauk iha implentasaun ba sentru formasaun akreditadu CNEFP (Tibar) no Don Bosco (comoro), Dili.

Média INDMO, 22-23/04/2014

Chandra Amaral Soares