SEPFOPE Loke Expozisaun Kareira Professional 2014 iha Maliana

Maliana - Sekretariu Estadu ba Politika Formasaun Professional no Empregu (SEPFOPE), Ilidio Ximenes da Costa akompanha husi Adjuntu Administrador Distritu Bobonaro, Diretor Nasional SEPFOPE, Komandante PNTL Distritu Bobonaro, Komandante F-FDTL, Diretor Eskola Sekundariu no estudante sira loke ofisialmente expozisaun kareira professional iha Distritu Bobonaro, Sexta (13/06).

Expozisaun kareira professional hanesan eventu ida ne’ebe importante ba estudante, professor ensinu sekundario no ba ekspozitor sira, tamba liu husi programa expozisaun kareira ida ne’e sai hanesan mata dalan ba maluk desempregu sira no estudante finalista sira atu bele heten informasaun husi empregador sira kona ba lala’ok serbisu no hili dalan ida ne’ebe mak sai prioridade wainhira sira ramata eskola nivel sekundariu.

Exposizaun kereira ne’ebe mak organiza husi SEPFOPE liu husi Diresaun Nasional Empregu ho hanoin ida atu bele fahe informasaun ba estudante finalista hodi bele hetan informasaun ne’ebe klaru husi empregador sira hodi nune’e estudante finalista sira bele hetan liu tan informasaun no bele desidi no hili tuir sira nia hakarak wainhira ramata sira nian estudu.

“Expozisaun ida ne’e sai hanesan parte importante ba ita nian alin finalista atu bele desidi sira nian futuru no hili dalan ne’ebe mak los ba sira nian futuru wainhira sira ramata sira nia eskola sekundariu,” haktuir  Sekretariu Estadu, Ilidio Ximenes iha nia diskursu abertura.

Liu husi expozisaun kareira, estudante pos-graduadu  sira hatene ona atu hili hodi kontinua ba universidade, sentru formasaun, tama Forsa PNTL no F-FDTL ou hakarak kontinua ba buka serbisu.

Expozisaun kareira professional ne’ebe SEPFOPE organiza liu husi Diresaun Nasional Empregu gasta orsamentu hamutuk $ 8. 100 USD, no programa ne rasik sei halo durante loron 2 iha Maliana Villa.

Eventu ne’e hetan partisipasaun husi estudante hamutuk 1012, husi númeru ne’e iha feto hamutuk 499 no mane 513 husi eskola sekundariu publiku Dom Martinho da Costa Lopes, Malibaka Yamata no 2, eskola sekundariu públiku no 3, eskola téknika  Agrikula Maliana,  Colegio Infante  de Sagre Maliana no eskola sekundariu Katóliku Maliana.

Expozitor ne’ebe hola parte iha eventu ne’e hamutuk 26 representante husi Instituisaun Governu, Timor Telkom, Telmor, Telkomsel, ONG nasional, internasional, Grupo Auto Empregu, universidade, PNTL, F-FDTL no PDHJ.