Liu Husi Formasaun SEPFOPE Prepara Joventude Atu Sai Autor no Nain ba Dezenvolvimentu

 “Jovens mak autor no na’in ba dezenvolvimentu” - nudar tema ba seminariu no lansamentu ba sentru juventude Distritu Lautem ne’ebe hetan suporta fundu husi Caritas Australia. Sepfope ne’ebe representa husi Chefe Gabinete sai mos orador ba eventu ida ne’e ne’ebe realiza iha Salaun Edukasaun Distritu Lautem iha Kinta, 29 Maiu 2014.

Atu hakbi’t kapasidade no eksplora talentu husi joventude hodi kontribui ba dezenvolvimentu nasional, sai nudar responsabilidade parte hotu hodi dudú joven sira no kuda konsiensia katak jovens nudar jerasaun foun tenke sai autor no na’in ba dezenvolvimentu iha Timor Leste.

Ho hanoin ida ne’e, juventude Lautem liu husi suporta husi Caritas Australia konsege halibur malu hodi organiza seminariu no lansamentu ba sentru juventude Distritu Lautem. Partesipante hamutuk 185 pessoas mak hola parte iha seminariu ne’ebe hato’o husi oradores nain hat: Deputado Aurelio Ribeiro husi Parlamentu Nasional, Sepfope ne’ebe representa husi Chefe Gabinete, Benigno Humberto da Cruz, Representante Sekretaria Estadu Juventude no Desportu João Rodrigues, Komandante PNTL Distritu Lautem, Marcos no Representante Administrador Distritu Lautem, Lino Ferreira.

Iha nia apresentasaun, Chefe Gabinete Sepfope akresenta politika Sepfope iha V Governu Konstitusional liu husi liafuan importante tolu: hatutan – hametin no hahú. Hatutan programa ne’ebe hala’o tiha ona husi governu anterior hodi hametin liu tan no hahú kria kreatividade ba programa inovativu tuir politika Sepfope hodi fornese kapasitasaun liu husi formasaun ba juventude tuir demanda merkadoria, hamenus desempregu liu husi programa empregu exterior no ekspansaun programa rural ba iha distritu bazeia ba Rezolusaun Konselhu Ministru No. 24/2013.

Iha parte seluk, Deputadu Parlamentu Nasional, Aurelio Ribeiro apresia tebes ho programa ne’ebe mak hato’o husi chefe gabinete Sepfope no sujere atu halo sosializasaun ba programa hirak ne’e, atu juventude sira bele hatene informasaun kona ba programa Sepfope, liu-liu hirak ne’ebe hela iha distritu no areas remotas. Aurelio mos hatutan katak jovens iha era ukun-an no era globalizasaun buka esforsa-an atu sai dinamizador ba dezenvolvimentu, katalizador hodi liga ba planu no implementasaun, motivador hodi dudú dezenvolvimentu ba oin, unido hodi buka solusaun ba problema, inovador hodi sai rasional, ideal no kreativu no mos sai hanesan evaluador ba programa ne’ebe realiza tiha ona. Liu husi pontu pozitivu hirak ne’e, joven sei kuda iha sira nia-an responsabilidade moral hodi bele sai autor no na’in ba dezenvolvimentu iha Timor Leste***

Hakerek na’in: Lucia da Câmara