Prezidente da Repúblika Sr. Taur Matan Ruak Inagura Uma Lima Kbit Laek Iha Seloi Malere

Presidente da Republika Sr. Taur Matan Ruak assina plaka inagurasaun uma lima no assiste husi Primeira Dama, Sra Isabel Feira no membro V Governu.

AILEU—Prezidente Repúblika Sr. Taur Matan Ruak, inagura uma kbit la’ek iha Suku Seloi Kraik hamutuk lima ne’ebe prepara husi Sekretariu Estadu Polítika Formasaun Profesional Empregu (SEPFOPE) no entrega ba komunidade ne’ebe konsidera kbit laek iha suku Seloi Kraik, postu Administrativu Aileu.

Hafoin inagura PR Taur hatete, nia parte orgulhu no fo parabens ba SEPFOPE ne’ebe mak ho nia ekipa harii ona uma lima ba povu kbiit laek sira. “Ha’u husu ba inan feton sira kbiit laek ne’ebe mak simu ona uma kbiit laek haree kuidadu halo didiak ba no labele atu sulan ka hakiak animal iha uma laran”, deklara PR Taur Matan Ruak iha ninia diskursu ba serimonia inagurasaun uma kbiit laek, Kinta (27/11).

Xefe Estadu dehan, uma lima ne’ebe mak ohin hamrik hodi hetan inagura ne’e governu liu husi SEPFOPE ho nia engineiru tekniku sira maka harii uma hirak ne’e atu oferese serbisu baziku ba populasaun sira, segundu garantia seguransa social sidadaun sira hodi aproveita oportunidade hirak ne’e hodi dezenvolve sira nia an.

“Esforsu atu harii uma hirak ne’e ho palavra papel ida importante estadu nian ne’ebe mak oferese serbisu baziku, seguransa ba ita nia populasaun sira”, dehan Taur.

Ba tinan ida ne’e nia laran estadu halo esforsu hodi hetan modelu uma ne’ebe diak no ikus mai ajuda fali ba povu kbiit laek sira ne’ebe mak laiha kapasidade atu harii uma rasik. Tan ne’e parte governu konstitusional lansa palavra ondra hakarak uma lima iha kada Aldeia ba populasaun kbiit laek sira, tanba ne’e populasaun sira iha teritoriu laran tomak hein ho espektiva bo’ot atu hetan oportunidade hirak ne’e hotu.

Xefe Estadu ne’e hatutan, enfelizmente ne’e ema hotu nia esforsu hodi hetan diak iha balun uma lima halo ona maibe sei la’o neneik hela no balun komesa iha erus ona, maibe la’os atu hapara ona iha dalan no hanesan kritika ida atu nune’e bele hadia fali eru hirak ne’e.

Xefe Estadu mos orgullu ho programa SEPFOPE nian ne’ebe mak halo uma lima iha suku sira hodi bele entrega ba ferik no katuas sira atu bele hela.

Iha fatin hanesan Sekretáriu Estadu, Ilídio da Costa, hatete, iha konstituisaun hakerek ona katak, oinsa mak atu hadia povu kbit laek nia moris, tan ne’e governu mos haree oinsa atu hadia. Ho uma lima ne’ebe halo entrega ba iha ferik nain haat no katuas nain ida ne’ebe konsege hetan uma iha suku seloi Kraik, postu Administrasaun Aileu halo husi produtu local, tanba uma ne’e rasik halo husi tizolu raimean. Maske nune’e iha mos uma fatuk ne’ebe SEPFOPE halo hela iha Distritu Manatuto hodi entrega ba iha ferik no katuas sira ne’ebe tama ona lista hodi simu uma ne’ebe prepara. Timor Post (JXN)