SEPFOPE ho INDMO fo akreditasaun ba SENAI iha area konstrusaun civil jeral

Sekretariu Estadu hare no ajuda direitamente servisu. SEPFOPE/Kandhi Barnez

Sekretaria Estadu Politika Formasaun Profisionál no Empregu (SEPFOPE) ho Institutu Nasionál Maundeobra (INDMO), iha loron 19 fulan Setembru 2012, fó akreditasaun ho nivel I no II ba Sentru Nasionál Formasaun Profisionál, SENAI Becora iha área konstrusaun civil jerál.
Sekretáriu Estadu Polítika Formasaun Profisionál no Empregu, Ilídio Ximenes da Costa, hateten katak sentru ida ne’e la’ós foin hetan akreditasaun, iha ona sentru 15 maka hetan ona akreditasaun, maibé iha área konstrusaun civil jerál nian foin hetan akreditasaun ne’e. Agora ba oin importante liu maka presiza halo promosaun atu ema bele hatene katak iha sentru ne’e, iha ema ne’ebé maka kualifikadu iha área oin-oin, hanesan kanalizasaun nian no konstrusaun sivil.
Diretora INDMO, Isabel Fernandes de Lima, esplika katak, Institutu Nasionál Maundeobra hanesan institutu ne’ebé mak halo akreditasaun ba sentru formasaun sira ne’ebé mak oras ne’e ezisti iha Timor-leste. Akreditasaun oras ne’e daudaun ami halo ona ba iha sentru formasaun hamutuk 15 ne’ebé mak iha territóriu tomak iha área oin-oin.
“Akreditasaun ida ne’e ami halo atu sentru formasaun sira ne’e iha abilidade hodi responde ba nesesidade indústria ninian no prepara ba kompetisaun internasionál, liu-liu iha rejiaun Ázia Pasífika,” esplika Isabel Fernandes de Lima.
Iha SENAI aleinde fó formasaun iha  área konstrusaun sivil kobre mós área haat seluk, hanesan, karpintaria, kanalizasaun, eletrisidade no konstrusaun.

1 comment:

  1. Parebens ba esforsu no serbisu ne'ebe mak SEFOPE no INDMO halo durante ne'e. Hau hakarak fo hanoin deit katak sebele karik atu hakerek presiza halo uluk koreksaun atu nune'e labele hakerek sala iha ne'eba, esemplu INDMO no laos INDIMO, no signifikadu husi INDMO ne'e diak liu hakerek tuir original ne'ebe iha.

    Obrigado no Boas Festas

    ReplyDelete

Related Posts Plugin for WordPress, Blogger...