SEPFOPE organiza Espozisaun Kerreira ba Juventude


Sekretaria Estadu Polítika Formasaun Profisionál no Empregu (SEPFOPE), iha loron 28 fulan Setembru organiza espozisaun karreira profisionál ba juventude ho ninia tema jerál “Hahú ohin, hanoin ita-nia karreira ba futuru” iha Sentru Konvensaun Dili, ne’ebé hala’o durante loron rua, hahú loron 28 no termina iha loron 29 fulan Setembru 2012.

Espozisaun ne’e eventu ida importante ba SEPFOPE tanba hanesan oportunidade atu bele fahe informasaun no orientasaun no mós atu fasilita estudante sekundáriu sira no sira-nia desizaun kona-ba sira-nia futuru profisionál ne’ebé iha ligasaun ho merkadu traballu.

Vise Primeiru-Ministru, Fernando Lasama de Araújo, haktuir “Feira ida ohin ne’e dehan de’it katak atu loke lisaun ba joven sira atu haree saida maka sira tenke halo agora, atu projeta ba futuru, sira atu bá ne’ebé, ba iha ne’ebá atu halo saida iha ne’ebá, sira iha ona  baze ida forte agora.

Sekretáriu Estadu Polítika Formasaun Profisionál, Ilidio Ximenes Da Costa esplika, “espozisaun karreira hanesan programa ida SEPFOPE nian no hala’o iha tinan-tinan no iha planu ami atu  realiza tan espozisaun karreira ne’e la’ós iha Díli maibé desentraliza fila fali ba iha Distritu, hodi fó formasaun no habelar informasaun ba joven sira, ho hanoin ida katak sira bele tetu, hakotu sira-nia futuru oin mai, kona-ba sira-nian desizaun atu hili servisu ida ne’ebé mak sira gosta.

Espozisaun ne’e hetan vizita hosi eskola  Ensinu sekundáriu hamutuk 22  iha Dili ho  totál estudante hamutuk rihun lima atus tolu no aleinde ne’e  eventu ne’e hetan mós finansiamentu hosi Australian AID, YEP (Youth employment Promotion Program), ILO no CEOP (Centro de Emprego e Orientação Profissional).

No comments:

Post a Comment

Related Posts Plugin for WordPress, Blogger...