Tuir Planu iha veteranus ativu 40 (Hat-Nulu) ne’ebe sei partisipa iha atividade ne’e, maibe barak la marka presenza tamba partisipa mos iha seremonia rekolha restus mortais husi herois nasionais sira.
Antes de hala’o estudu komparativu, ekipa veteranus ativu ne’ebe akompanha husi Tenente Koronel, Komandante Forsa Terestre F – FDTL, Alberto Dos Santos hala’o enkontru hamutuk Sekretariu Estadu Polítika Formasaun Profissional, Ilidio Ximenes da Costa iha Eskritoriu Provizoriu SEPFOPE, Obrigado Barak.
Iha oportunidade ne’e, Sekretariu Estadu apresia tebes ho disponibilidade husi veteranus ativu sira ne’e, ne’ebe la klaur tán sei reforma husi sira nia kargu tuir lei ne’ebe vigora. Ilidio hatutan katak esperiensia durante nudar forsa sei nakfilak-án no sai ativa hodi servi komunidade.
“Veteranus ativu sira ne’e sei reforma, maibe nafatin kontribui ba nasaun ho sira nia forsa aspirasaun, inspirasaun no kompromisu ba komunidade, sira sei ativamente hahú ho buat foun iha komunidade nia let.”
Hasa’e kapasitasaun no skill sai nudar assuntu importante ba veteranus ativu sira ne’e, ho razaun ida ne’e sira sei hetan konhesementu liu husi estudu komparativu iha sentru formasaun iha area oin-oin hanesan karpíntaria, soldadura, pedreira, kanalizasaun, eletrisidade. Husi veteranus nia partisipasaun iha atividade ne’e, bele fo mos motivasaun profunda ba jovens sira atu halo luta foun iha era dezenvolvimentu.
Tuir Sekretariu Estadu, SEPFOPE iha programa Auto-Empregu ne’ebe bele fo suporta ba inisiativa grupu sira ne’ebe hakarak dezenvolve atividade ne’ebe bele fo benefisiu komún. Ilidio sublinha mos progressu husi Kompanha ‘Karya Kembar’ ne’ebe prodúz keramik/cerâmica iha Maliana sai nudar exemplu diak.
Kompanha ne’e konsege hetan ona osan hamutuk $ 7.700 USD husi keramik ne’ebe sira fa’an, no oferese ona produsaun meja husi keramik ba Presidente Repúblika, Taur Matan Ruak. Haree ba progressu ida ne’e, Afaça (Quelecai) no Turiscai haruka mos sira nia membru atu tuir formasaun keramik iha Maliana.
Programa seluk ne’ebe Ilidio Ximenes hato’o mak hanesan programa ‘uma lima’ ne’be sei konstrui husi tijolu nudar material husi produsaun lokal, hanesan iha Glenu no Liquiça. Programa pilotu ba konstrusaun ‘uma lima’ sei hahú uluk iha Daulorok (Soibada) no Nahareka (Ossu). Além de ‘uma lima’, iha mos programa turismu komunitariu nudar dalan atu halo koperasaun ho veteranus sira ba desenvolvimentu fatin históriku ba luta independensia.
“Vontade diak husi veteranus sai nudar exemplu diak ba kontinuasaun kolaborasaun iha futuru, wainhira iha kompromisu dalan husi SEPFOPE sempre nakloke, veteranus sira sei hasa’i farda ida maibe sei hetan fali ‘farda’ foun mak sira nia partisipasaun no kontribuisaun ba komunidade liu husi hahalok, hanoin hodi kontribui ba mudansa mentalidade joventude hodi haree ba vizaun dezenvolvimentu nasaun” Ilidio hateten liafuan ne’e hodi akresenta tan idea husi Presidente Repúblika ne’ebe dehan katak forsa la’os hela deit iha komponente laran, maibe involve – án mos iha atividade komunitária.
Iha parte seluk, Tenente Koronel, Komandante Forsa Terrestre F-FDTL, Alberto dos Santos hateten katak partisipasaun veteranus sira iha atividade estudu komparativu sai nudar exemplu diak ba joven sira, tamba bele inspira joven sira hodi hanoin híkas-fali kompromisu luta husi katuas sira ne’e no atualizasaun kompromisu ba luta foun iha dezenvolvimentu importante tebes atu juventude sira hetan forsa moral husi prinsipiu kompromisu vetarunus ba luta ukun rasik-án.
“Veteranus sira ne’e iha kompromisu durante tinan barak ba ukun rasik-án, ohin loron nafatin iha kompromisu atu liberta povu husi kiak no mukit liu husi integrasaun no partisipasaun ativa iha komunidade wainhira reforma husi kargu”, Komandante Alberto hateten iha nia diskursu.
Tuir Alberto, preparasaun jovens sira importante tebes no ida ne’e presisa envolve parte barak além de liu husi eskola téknika professional, sira mos presisa hetan motivasaun no kompromisu principal, pur exemplu presenza veteranus sira nia marka pasu importante ba sira nia progresu. Komandante forsa terrestre F-FDTL ne’e observa katak preparasaun ba juventude atu kompete iha merkadu trabalhu importante tebes tamba dezafiu lubuk ida sei mai wainhira Timor Leste tama ba Asean.
Hafoin sorumutu entre Sekretariu Estadu no Komandante Alberto ho membru veteranu ativu, ekipa DNAFOP no veteranu ativu kontinua hala’o visita ba sentru formasaun tolu hanesan CNEFP – Tibar, Don Bosco Comoro no Senai – Comoro.
Iha sentru tolu ne’e, veteranus sira observa besik oinsa mak joven sira aprende no servisu iha area oin-oin hanesan karpintaria, kanalizasaun, pedreira, instalasaun ba elektresidade, oinsa atu utiliza solar panel, agrikultura, konstrusaun, kursu oin-oin hanesan formasaun ba lingua, formasaun ba formadores, formasaun administrativa no komputadora.
Liu husi observasaun ne’ebe hala’o iha loron tomak, parte veteranus apresia tebes progresu ne’ebe joven sira hetan iha sentru formasaun tolu ne’e. Sira husu atu halo kolaborasaun besik liu tan iha futuru atu bele hasa’e mos kapasidade no skill husi parte militares: veteranus no jovensmilitares sira atu nune’e sira nia envolvimentu signifikativu iha komunidade bele hetan fuan ou resultadu ne’ebe diak ba luta dezenvolvimentu nasional.***
No comments:
Post a Comment