Rezolusaun Konselhu Ministru No. 24/2013 Hakarak Saida husi SEPFOPE ?

Involvimentu SEPFOPE iha atividade hanesan loke dalan rural, hadia ponte, baleta, turismu komunitariu no sst, hamosu pergunta barak husi parte balun inklui mos Membru Parlamentu Nasional, tamba sa SEPFOPE?
Liu husi konversasaun husi Sekretariu Estadu, Ilidio Ximenes da Costa ho Media SEPFOPE no halo mos intervista ho Jornal Matadalan iha Eskritoriu Provizoriu SEPFOPE, Kuarta (12/02) relasiona ho preokupasaun membru balu husi Parlamentu Nasional kona ba implementasaun atividades ne’ebe temi iha leten, Sekretariu Estadu akresenta katak iha Debate Orsamentu Jeral Estadu, parte SEPFOPE justifika tiha ona dúvidas hirak ne’ebe mosu.

Tuir Ilidio, SEPFOPE nudar ajensia implementador Governu la implementa atividades tuir nia hakarak, maibe sempre bazeia ba baze legal ida. Rezolusaun Konselhu Ministru No. 24/2013 fo autorizasaun ba SEPFOPE atu halo implementasaun atividade rural hanesan: loke Estrada, hadia baleta, turismu komunitariu no sst. Ida ne’e mos implika ba liafuan tolu importante: Politka, Formasaun no Empregu. Politika implika ideais, inisiativa, kreatividade hodi haree ba formasaun saida mak bele fornese; empregu implika involvimentu seitor oin-oin hanesan auto-empregu, kompanhia, seitor turismu no sst. hodi responde ba desempregu ne’ebe atualmente ita enfrenta.

Sekretariu Estadu akresenta katak buat hirak ne’ebe SEPFOPE halo iha area rural, hanesan estrada, bazeia mos ba aspirasaun husi komunidade ne’ebe dala barak lamenta ba asesu ba fatin públiku no merkadu. Sira presisa lori produtu lokal ba merkadu hodi manan netik osan ruma ba nesesidade básika hanesan suporta ba labarik nia eskola, hola fós, ropa no sst. Oinsa sira bele hetan netik osan oituan se dalan atu asesu ba merkadu la iha? Ita presisa iha sensibilidade atu responde ba nesesidade atual ne’ebe ita nia povu enfrenta iha area rural. Politika loke estrada nudar ‘multiplying effect’ signifika loke buat ida maibe bele kontribui ba buat barak.

Kona ba kualidade no kolaborasaun ho Ministeriu kompetente, Ilidio afirma katak SEPFOPE haree mos ba assuntu kualidade husi projetu ne’ebe iha, no atu klaru liu tan bele konfirma ho parte ADN tamba husi 47 prejetu ne’ebe SEPFOPE implementa, ADN konsege sobu ou rekomenda projetu 2 atu hadia diak liu tan nia kualidade. Ida ne’e signifika, buat ne’ebe ami halo iha kualidade. Dala barak ema halo jeneralizasaun hodi haree deit ba pontu negativu ida ou rua no foti konkluzaun katak buat hotu sai negativu. Kolaborasaun importante atu bele kria planu integradu ba atividade ne’ebe iha.

Hakerek Nain : Clelio Alves | Foto : Kandhi Barnez