Komunidade Husu SEPFOPE Kontinua PER

Sekretariu Estadu, Ilidio Ximenes hala'o dialogu ho komunidade Suku Com,
Sub-Distritu Lautem. Iha Diskusaun ne'e, SE Ilidio hetan akompania husi
eis Sekretariu Estadu Dezenvolvimentu Rural, Papito Monteiro.

LOSPALOS : Sekretáriu Estadu Politika Formasaun Profisionál no Empregu (SEPFOPE) hala’o inspesaun ba Programa Empregu Rural (PER) iha Distritu Lautem, Sábadu (9/2).

Iha inspesaun ne’e Sekretáriu Estadu, Ilídio Ximenes husu ba kompañia ne’ebé kaer obra ne’e hala’o servisu di’ak liután. Tanba, área ne’ebé mak kompañia hala’o servisu ne’e nia kondisaun aat.

Nune’e, Sekretáriu Estadu mós hala’o dialogu ho komunidade Aldeia Pitileti, Suku Com, Sub-Distritu Lautem. Iha diskusaun ne’e, komunidade husu atu kontinua projetu PER. Tanba, área ne’e iha potensialidade ba área turizmu, agrikultura no pekuaria.

Loron ne’e, Sekretáriu Estadu, Ilídio Ximenes hala’o vizita ba fatin produsaun Herbal Shop Pitileti. Grupu servisu industria herbal, husu ba Sekretáriu Estadu atu apoiu harii kazerna ba produtór sira atu bele fasilita sira hodi halo servisu ho di’ak liután.

Iha Domingu (10/2), Sekretáriu Estadu, Ilídio Ximenes mós vizita projetu estrada PER ne’ebé liga Suku Com-Bauro no Suku Mehara, Distritu Lautem.

Hafoin ne’e, Sekretáriu Estadu hala’o viazen ba Aldeia Caisidu, Suku Tirilolo, Distritu Baukau hodi haree projetu estrada PER ne’ebé remata ona.

Iha oportunidade ne’e, haree mos projetu estrada ne’ebé sujere husi Amu Bispu Dioseze Baukau, Don Basilio do Nascimento atu liga estrada husi Suku Tirilolo ba Suku Kairavella, Sub-Distritu Vemasse.

Komunidade iha área ne’e mós husu ba SE Ilídio atu kontinua programa ne’e. Tanba sira haree katak, programa ne’e ajuda tebtebes komunidade sira hodi bele aumenta rendimentu.

Tuir komunidade sira, projetu estrada ne’ebé implementa liu husi PER bele fasilita sira hodi hala’o fa’an sira nia produtu lokál husi área rurál ba kapitál.