Loron Domin, SEPFOPE Fahe Kapaseti

DÍLI—Loron 14 Fevereiru hanesan loron domin nian. Ema barak fahe aifunan ba malu hodi komemora loron ne’e. Maibé, Sekretáriu Estadu Polítika Formasaun Profisionál no Empregu (SEPFOPE) la’os fahe aifunan maibé fahe Kapaseti. Fahe Kapaseti atu salve ema nia vida wainhira halo servisu hodi kaer obra ka projetu.

“Disiplina ne’e importante. Tantu iiha uma ka iha ne’ebé de’it ita tenki uza buat ne’ebé iha. Tanba ne’e, ha’u husu ba traballadór sira atu ita respeitu maka buat hotu bele la’o ba oin. Ita bo’ot sira iha direitu servisu iha fatin ne’ebé maka dignu, seguru, saudavel,” Sekretáriu Estadu Polítika Formasaun Profisionál no Empregu (SEPFOPE), Ilídio Ximenes da Costa ba traballadores sira iha Timor Plaza, Kinta (14/02).

Nia esplika, lei projetu atu ema hotu-hotu asesu buat sira ne’e iha servisu fatin. Lei ne’e hakerek iha artigu 34 obriga katak empregadór sira tenki aseguru traballadores atu servisu iha fatin ne’ebé saudável, fatin ne’ebé maka seguru no fatin ne’ebé maka higene ba sira nia kondisaun iha servisu fatin.

Tuir Ilídio, wainhira empregadór ida maka la asegura ekipamentu protesaun individual no hetan asidenti iha servisu fatin ne’e sira iha obrigasaun atu simu pensaun tuir lei traballu.

“Obrigasaun ba ita boot sira mós hanesan iha artigu 36, hateten ita boot sira tenki kuidadu sasán sira ne’ebé maka empregadu sira intrega ba ita boot sira ne’e,” nia hatutan.

Iha fatin hanesan, Vicente Oliveira Soares nu’udar supervaizór jenerál ba traballadores iha Timor Plaza hateten, nia orgullu no kontenti teb-tebes bainhira fahe kapaseti tanba bele fó garantia ba traballadores nia vida.

Hafoin intrega tiha ekipamentus ne’e ba traballadores iha Timor Plaza, SEPFOPE ho nia ekipa kontinua hakat mai iha tasi ibun Palapasu hodi intrega mós ekipamentus kapaseti ba traballadores ne’ebé servisu iha area ne’ebá nian.

Simu Sansaun

Iha biban ne’e, Sekretáriu Estadu Polítika Formasaun Profisionál no Empregu (SEPFOPE), liu husi Diresaun Inspesaun Jerál ba servisu (IJS) ba tinan ida ne’e sei hala’o servisu hale’u Timor atu haree kompañia ida ne’ebé de’it mak manán tender husi governu ka husi sé de’it maka kaer servisu laiha ekipamentus protesaun ba traballadores sei simu sansaun tanba lei maka obriga.

“Tinan ida ne’e ita tenki obriga malu atu uza ekipamentus kapaseti nune’e fó seguransa ba traballadores no atu esplika traballadores sira oinsá uza sasán sira ne’e,” Sekretáriu Estadu Polítika Formasaun Profisionál no Empregu (SEPFOPE), Ilídio Ximenes da Costa hato’o kestaun ne’e wainhira fahe ekipamentus ba traballadores iha Timor Plaza, Kinta (14/02).

Nia dehan, tinan ida ne’e, tinan asaun para hahú lao tuir lei ne’ebé maka  iha no lei ne’ebé maka iha ita tenki kumpri.

“Ita boot sira mós kuandu la uza ekipamentus ne’ebé ita boot sira iha sei hetan sansaun disiplinár. Bainhira la utilize sasán sira beibeik ne’e bele hasai husi servisu fatin,” IlÍdio informa.

Entertantu, Manejer Kompañia Hidayat Ahmad Alkatiri hateten sira la’os foin uza kapaseti maibé uluk kedas. Ami nia kompañia hola ekipamentus hanesan Kapaseti, Lubas, no sapatau fó ba traballadór sira uza. Soké sira (traballadór) maka la kuidadu. Dala ruma sira baku rahun tiha.

“Ha’u sente ba oin ami sei halo tuir regulamentu ne’ebé SEPFOPE fó sai dadauk ona maibé ha’u husu mós koñesemntu ouituan ba traballadores nune’e sira bele halo tuir,” nia sujere. BUSINESS TIMOR